Bıylǵy sýǵa túsý maýsymynda el boıynsha 177 adam ajal qushqan. Bul san – byltyrǵymen salystyrǵanda 5 paıyzǵa azaıǵan. Bıyl Soltústik Qazaqstan oblysynda da 5 adam sýǵa batyp qaıtys boldy.
Byltyr da bes adam sýǵa batyp ketip edi. Olardyń tórteýi sýǵa túsýge ruqsat etilmegen jerde kóz jumsa, bireýi balyq aýlaýǵa shyqqanda qaýipti jerdi eskermegen. Al 2021 jyly 22 adam ajal qushty.
Oblystyq Tótenshe jaǵdaılar departamentiniń Azamattyq qorǵanys basqarmasy bastyǵynyń mindetin atqarýshy, maıor Qýat Mahmetovtiń málimdeýinshe, qutqarýshylar bıyl 2115 ret shuǵyl shaqyrý men baqylaýǵa shyqqan. «Byltyr 2071 dabyl túsken bolsa, bıyl bul san 44-ke artqan. Barlyq dabyldyń ishinde sýdyń astynan izdeý jumystary – 5, sýǵa batýdan qutqarý – 28, qaýipti sý qoımalaryn baqylaý men qadaǵalaýǵa 2082 ret bardyq. Qyzmetkerlerimizdiń jedel is-qımyldarynyń arqasynda 39 adam qutqaryldy. Onyń úsheýi – bala. Jalpy, oblysta keıingi alty jylda 201 adam sýǵa batyp bara jatqan jerden qutqaryldy», dedi ol.
Qutqarýshylar halyqty qaýipten saqtandyrýǵa da kóp kóńil bólip otyr. BAQ arqyly basqarma qyzmetkerleri 84 ret brıfıng uıymdastyryp, turǵyndardy sýǵa túsý kezinde saq bolýǵa, tek belgilengen jerlerde ǵana sýǵa túsýge shaqyrǵan. Sonyń ishinde balyqshylarǵa arnaıy toqtalyp, kóktemgi jáne kúzgi, qysqy maýsymdarda muzdyń juqalaǵyna únemi nazar aýdarýdy eske salyp otyrǵan. Baspasóz quraldarynda 119 eskertý maqalasy jarııalaǵan. Tótenshelikter 4835 reıd pen baqylaýǵa shyqqan.
Budan bólek, sýǵa túsetin aımaqtarda 199 eskertý ilinip, qaýiptiń aldyn alý maqsatynda reıdter júrgizilgen. Sýǵa túsýge yńǵaıly bolsa da aıaqqa oralatyn baldyry kóp, qaırańdaǵy tasy qaýipti jerlerge 4255 tyıym salý belgisi ornatylǵan. Biraq ókinishke qaraı, keı azamattar mundaı eskertýlerdi de elemeı, sýǵa túsýge tyıym salynǵan aımaqtarǵa demalysqa shyqqan. Jalpy, quzyrly organnyń eskertýlerine eleń etpegenderge Ákimshilik quqyq buzýshylyq týraly kodekstiń 440-baby – «Qoǵamdyq jerlerde tártip buzýǵa» sáıkes aıyppul salynady.
Qýat Mahmetov adamdar eń aldymen jeke qaýipsizdigin oılaǵanda ǵana qaıǵyly jaǵdaılardyń az bolatynyn atap ótti. «О́kinishke qaraı, óńirdiń kóp turǵyny apattyń aıaq astynan ekenin umyt qaldyrady. Eskertýler men erejelerge eleń etpeıdi. Qaýipti jaǵdaı tek basqa bireýlerdiń basyna ǵana keletin sııaqty kóredi. Biraq «Saqtansań – saqtaıdy» degendi árkim esinen shyǵarmaýy kerek», dedi ol.
Soltústik Qazaqstan oblysy