Jýyrda Astanadaǵy ındýstrııalyq parktegi Lokomotıv qurastyrý zaýytynyń óndiristik konveıerinen bes júzinshi lokomotıv jasalyp shyqty.
Negizi zaýytta úsh túrli temirjol mashınasy jasalady. Olar: bir seksııaly TE33AS serııaly magıstraldyq júk teplovozy, bir seksııaly TE33A serııaly magıstraldyq jolaýshylar teplovozy jáne TEM 11A serııaly manevr teplovozy. Qazir tolyq qýatynda jumys istep turǵan zaýytta aı saıyn 10 lokomotıv qurastyrylady.
Atalǵan zaýytta jańa tehnologııalar engizilip, ekologııalyq taza, ekonomıkalyq turǵyda óte únemdi temirjol mashınalary qurastyrylyp jatyr. Sondaı-aq ınnovasııalyq tásilderdiń utymdy qoldanylýy jáne zaýytta kileń kásibı mamandardyń jumys isteýi kásiporyndy jańa beleske kóterdi. «Sóıtip, zaýytty ishki jáne syrtqy naryqqa lokomotıv shyǵarý men jetkizýde kóshbasshylardyń birine aınaldyrdy. Keıingi 10 jylda kompanııa lokomotıvteri álem elderiniń suranysyna ıe bolyp úlgerdi. «Zaýyt tarıhynda 2023 jyldyń 17 tamyzy aıtýly data bolyp qalady. Bul kúni 500-lokomotıv shyǵaryldy», deıdi «Lokomotıv qurastyrý zaýyty» AQ-nyń óndiris boıynsha vıse-prezıdenti Tólegen Jańabaev.
Kásiporynnyń 500 lokomotıvi elimizdiń «Qazaqstan temir joly» ulttyq kompanııasynyń paıdalanýyna jiberilgen. Qazirgi tańda zaýytta 800-den astam jumysshy eńbek etedi.
Jalpy, otandyq lokomotıvterdiń sapasy men senimdiligine ishki ǵana emes, syrtqy naryq tutynýshylary da joǵary baǵasyn berip otyr. Belsendi marketıngtik qyzmet pen basqa eldermen seriktestik qatynastardy sátti ornatýdyń nátıjesinde kompanııa óz ónimderin álemdik naryqqa shyǵaryp keledi. Búgingi kúnde otandyq lokomotıvter birqatar alys-jaqyn shetelderge eksporttalǵan. Olardyń qatarynda Ázerbaıjan, Ýkraına, Túrikmenstan, Tájikstan, Qyrǵyzstan, Moldova bar.
Kásiporyn óz tabysynyń mańyzdy faktorlaryn ınnovasııalar men tehnologııalardy damytý baǵytynan kóredi. О́z kezeginde kompanııa zertteý men ázirlemelerge belsendi qatysyp júr.
«Lokomotıv qurastyrý zaýyty» AQ qol jetkizgen osy jetistigi sheńberinde ǵana qalyp qoımaıdy. О́ndiris kólemin ári qaraı ulǵaıtýǵa, ınnovasııalardy jalǵastyrýǵa jáne jetkizý geografııasyn barynsha keńeıtýge kúsh salady. Bizdiń josparymyzda sony seriktestermen yntymaqtastyq ornatý, jańa tehnologııalardy engizý, sondaı-aq lokomotıvterdiń basqa da modelderin ázirleý syndy jobalar bar», deıdi Marketıng jáne satý bóliminiń bastyǵy Raýan Dóńsebaev.
Lokomotıv qurastyrý zaýyty – elimizdegi jetekshi kásiporyndardyń biri ǵana emes, qazaq eliniń maqtanyshy. О́ndiristiń joǵary deńgeıi men ónim sapasynyń arqasynda kompanııa halyqaralyq arenada óziniń qatysýyn nyǵaıtýdy jalǵastyryp jatyr. Al zaýyt ujymy Qazaqstandy senimdi jáne ınnovasııalyq lokomotıvterdi eksporttaýshy el retinde tanystyryp jatqandaryn maqtanysh kóredi. Onyń anyq dáleli el aldynda.
Eń bastysy elimizden shyǵarylǵan lokomotıvterdiń tıimdiligi joǵary, paıdalaný shyǵyny az jáne ekologııalyq qaýipsiz qasıetterge ıe.
Memleket basshysy atap ótkendeı: «Qazir kóptegen el ishki naryqty qorǵaý sharalaryn belsendi túrde qoldanyp otyr. Tipti damyǵan elder proteksıonıstik ındýstrııalyq saıasatqa kóshti. Qazaqstanda DSU klassıfıkasııasy boıynsha ishki naryqty qorǵaý deńgeıi tómen bolyp sanalady, tek 128 tarıftik emes sharalar qoldanylady. Sondyqtan bizge saýda saıasatynda jańa, batyl tásilder qajet».
Árıne, bul sheteldik aksıonerlerge bizdiń zaýytty damytýǵa qosymsha qarajat salýǵa jańa bir jiger syılaıtyndaı. Eskere ketin bir jaıt, tek 2022-2023 jyldardyń ózinde ǵana zaýyt aksıonerleri qosymsha sehtardyń qurylysyna jáne jabdyqtardy satyp alýǵa qosymsha 3,5 mıllıard teńgege jýyq ınvestısııa saldy. Bir qýanarlyǵy, munyń bári múmkin boldy. Qazir olar el basshylyǵynyń otandyq óndirýshilerdi qoldaýǵa jáne damytýǵa daıyn ekenin de kórip-bilip otyr. Jalǵyz otandyq lokomotıv óndirýshi kásiporynnyń qyzmetkeri retinde aıtarym, Prezıdenttiń «Memleket otandyq óndirýshilerdi qorǵaýǵa mindetti. Bul bizdiń ekonomıkamyzdy syrtqy álemnen jabý sıgnaly emes. Ol ashyq kúıinde qalýy kerek, biraq ulttyq bıznestiń múddelerin eskere otyryp» degenine qatty qýandym», dedi T.Janabaev.