14 kezeńnen turatyn, 1300 shaqyrymǵa sozylatyn «Uly dala joryǵy» marafon-báıgesiniń jetinshi kezeńi máresine jetti. Shabandozdar endi attaryn aıyrbastap tyń tulparyn tizgindeıdi, dep habarlaıdy Egemen.kz «JORYQ» at sporty federasııasyna silteme jasap.
Jetinshi kezeńde Qostanaı oblysynyń komandasy kómbege aldymen kelse, Astana qalasynyń shabandozdary ekinshi jetti. Úshtikti Aqtóbe oblysynyń jigitteri túıindedi. Joryq marafonyna uzyn-yrǵasy 19 komanda qatysyp, sóreden jiberilgen bolatyn. Jeti kezeńnen keıin 7 komanda yǵysyp jarysty toqtatty. Qalǵan 12 komanda shabandozdary áli 650 shaqyrymdy óndirýi kerek.
Joba jetekshisi, «JORYQ» at sporty federasııasynyń prezıdenti Baqytjan Turlybek qalǵan komandalar arasyndaǵy tartys ta qyza túsedi dep otyr. О́ıtkeni barlyǵy da tyń attaryn erttep minedi.
«Byltyrǵy marafon-báıgede 600 shaqyrymdy 9 komanda 32 atpen ótse, bıyl 650 shaqyrymdy 12 komanda 41 atpen alǵashqy kezeńdi aıaqtap otyr. Byltyr 650 shaqyrymdy birinshi bolyp baǵyndyrǵan komandanyń ýaqyty shamamen 56 saǵatty qurasa, bıyl 42 saǵatta júrip ótti. Bul attardyń babynda ekeniniń dáleli. Ekinshiden, básekeniń óte joǵary ekenin de aıqyndaıdy. Sondaı-aq 1-kezeńniń 4 aty komandadan tys 1300 shaqyrymdy baǵyndyrýǵa bekinip otyr. Onyń bári mal dárigeriniń ruqsatymen júzege asady», dedi B.Turlybek.