Ár ultty erekshelendiretin – dástúrli qundylyqtary. Adamnyń jeke qoltańbasy bolatyny sekildi, ár ulttyń qoltańbasy ispetti dara ádet-ǵurpy, salt-sanasy bar.
2020 jyly RF Bashqurtstan Respýblıkasynyń basshysy Radıı Habırov halqynyń usynys-tilegin eskerip, ulttyq kostıým kúnin bekitti. Bıyl 8 qyrkúıek kúni Ýfa qalasynda osy shara keńinen atalynyp ótti. Ulttyq kıim kúni «Mıras» án-bı ansambliniń «Bashqurtstan» kompozısııasymen ashylyp, bashqurttyń halyq ánderi oryndaldy. «Inzer», «Sarmat» bıshiler toby kórermenge ulttyq bıden shashý shashsa, túrli mamandar kostıým túrlerin tanystyryp, ony jasaýdyń sheberlik saǵattaryn ótkizgen.
– Ulttyq kostıým – kez kelgen halyq mádenıetiniń ajyramas bólshegi. Bul jaı ǵana kıim emes, bútin ulttyń bet-bederin aıqyndar ulan-ǵaıyr tarıh. Ony jan-tánimizben berik qorǵaýymyz kerek. Bizdiń kitaphanada ulttyq kostıým týraly hám ózge de túbirli tarıh tórkinin baıandaıtyn eńbekter az emes, – deıdi Ýfadaǵy Ahmet Zákı Ýálıdı atyndaǵy ulttyq kitaphananyń dırektory Marat Zulqarnaev.
Bashqurtstan eliniń merekesi bizge úlgi bola alarlyq. Elimizde ulyqtaýǵa turarlyq salt-joralǵylarymyz, ulttyq kıimderimiz jeterlik. Ulttyq kıimimizdi ulyqtaý arqyly halyqty eldik qundylyqtarǵa jaqyndata túser edik.