Otan aldynda boryshyn ótep júrgen sarbazdar ulttyń mádenı jaýharlarymen jiti tanys bolǵany jón. Ásirese Jetisý óńirinde eldiń aınasyna aınalǵan rýhanı jádiger jeterlik. Sonyń biri – Muhametjan Tynyshbaev atyndaǵy oblystyq tarıhı-ólketaný mýzeıi. Jaqynda Úshtóbe garnızonyndaǵy 15603 áskerı bólimniń sarbazdary rýhanı shańyraqqa bas suǵyp, tuńǵysh temirjol ınjeneriniń ómir deregine úńildi.
Bıyl kóktemde Otan aldyndaǵy boryshyn óteý úshin Qaraǵandy oblysynan shaqyrylǵan 30-dan astam merzimdi qyzmettegi sarbaz túrli jádigerlermen tolyqqan mýzeı ekspozısııasymen tanysyp, olardyń tarıhyn surap bildi. Kóne tarıhtyń kýási bolǵan qundy jádigerler týraly jan-jaqty aıtyp bergen mýzeı qyzmetkerleri sarbazdar qoıǵan suraqqa tushymdy jaýap qaıtardy.
«Árbir sarbaz – ulttyń ustyny. Onyń tek eldiń qorǵanys salasyna ǵana emes, rýhanı ómirine de aralasýǵa quqyǵy bar. Biz jas sarbazdarǵa kitap oqýǵa, teatr tamashalaýǵa, mýzeılerdi aralaýǵa múmkindik beremiz. Bir jyl ishinde birneshe kitap oqyǵan jastar da bar. О́ńirdegi mýzeıler alystan kelgen jigitterge osy ólkeden shyqqan alyp tulǵalardyń ómirinen sabaq alýǵa múmkindik beredi. Ári Jetisýdyń tarıhymen tanysýǵa jol ashpaq», deıdi Jetisý garnızony baspasóz qyzmetiniń bastyǵy, maıor Janat Sembaev.
Qazirgideı jahandaný kezeńinde murajaılar tarıhı murany saqtaý, óskeleń urpaqty patrıotızm men azamattyqqa tárbıeleý, jastardyń tarıhı sanasyn qalyptastyrý syndy asa mańyzdy baǵytta erekshe rólge ıe. Osyǵan oraı áskerıler ózderin tolǵandyrǵan pikirlerin ortaǵa salyp, júrekjardy tilekterin bildirdi. Solardyń biri – áskerı bólimniń sarbazy, qatardaǵy jaýynger Temirlan Qýatbek. «Mýzeıge jasalǵan ekskýrsııa qatty unady. Biz bul jerden kóne tarıhı eskertkishterdi kórdik. Osyndaı is-sharalar sarbazdardyń rýhtaryn kóterip, tanymdyq deńgeıin arttyratynyna senimdimin», deıdi ol.
M.Tynyshbaev atyndaǵy oblystyq tarıhı-ólketaný mýzeıinde sarbazdar Ekinshi dúnıejúzilik soǵysta qoldanylǵan myltyq, zeńbirek, granata sekildi qarý-jaraq pen sol kezdegi áskerı kıim úlgilerin tamashalady.
«Búgingi kúni qoǵamda mýzeıdiń alatyn orny erekshe. Mýzeı – keshegi tarıh, búgingi ǵylymı-zertteý ortalyǵy, erteńgi kemel bolashaǵymyz. Mýzeı – tarıhı-mádenı jáne ǵylymı qundylyqtardy saqtaýǵa, jádiger zattar arqyly málimetterdi jınaqtap taratýǵa, óskeleń urpaqqa ata-babamyzdan qalǵan muralar jóninde tálim-tárbıe berýge arnalǵan, tarıhı qalyptasqan kópqyrly áleýmettik aqparattar ınstıtýty», degen 15603 áskerı bólim komandıriniń tárbıe jáne ıdeologııalyq jumystar jónindegi orynbasary, bólim bastyǵy, maıor Beken Asylbekov merzimdi qyzmettegi sarbazdardyń dúnıetanymyn keńeıtip, bilimin jetildirý úshin osyndaı ekskýrsııalar udaıy uıymdastyrylyp turatynyn aıtty.
Jetisý oblysy