Oral qalasynda esirtki untaǵyn satqan 16 jastaǵy mektep oqýshysy ustaldy. Ol tyıym salynǵan zatty jasyryn oryndarǵa qoıyp ketý kezinde qolǵa tústi, dep habarlaıdy Egemen.kz Ishki ister mınıstrliginiń baspasóz qyzmetine silteme jasap.
Elimizde 1 maýsym men 30 qazan aralyǵynda «Qarasora - 2023» jedel-profılaktıkalyq is-sharasy júrgizilip keledi.
«Keshendi jospar aıasynda esirtki qylmysyna qarsy kúres jáne quqyq buzýshylyqtyń aldyn alý boıynsha jumystar kúsheıtildi. Respýblıka aýmaǵynda esirtki daqyldaryn ósiretin jerlerdi jáne olarmen aınalysatyn tulǵalardy anyqtaýǵa baǵyttalady. Jedel-profılaktıkalyq is-sharasyn ótkizý barysynda polısııa departamentiniń qyzmetkerleri 94 esirtki qylmysyna qatysty quqyq buzýshylyq faktilerin anyqtady, onyń ishinde 44 qylmys jáne 55 qylmystyq áreket anyqtaldy», delingen aqparatta.
Batys Qazaqstan oblysynyń Polısııa departamenti esirtki qylmysyna qarsy is-qımyl basqarmasy men Oral qalasynyń Polısııa basqarmasynyń qyzmetkerleri birlesip júrgizgen jedel-profılaktıkalyq shara barysynda 11-synyp oqýshysy ustaldy.
«Ol qylmys ústinde ustaldy, ony jeke tintý kezinde ishinde erekshe ıisi bar untaq zat salynǵan jasyl tústi ızolentamen oralǵan 2 qaptama tabylyp, tárkilendi. Onyń telefonyn tekserý kezinde jasyrý oryndarynyń koordınattary anyqtaldy, onyń kómegimen ishinde arnaıy ıisi bar untaq salynǵan jasyl tústi ızolentamen oralǵan 23 qaptama tárkilendi. Saraptama boıynsha tárkilengen zattyń salmaǵy 20,18 gramm bolatyn sıntetıkalyq esirtki zaty ekeni anyqtaldy. Ustalǵan azamatqa qatysty QR QK-niń 297-baby 3-tarmaǵy 3-bóligi (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha sotqa deıingi tergep-tekserý amaldary bastaldy», dep habarlady vedomstvonyń baspasóz qyzmeti.