Prezıdent Qasym-Jomart Toqaev Ortalyq Azııa elderiniń kólik-logıstıkalyq áleýetin tolyqqandy iske asyrý qajet ekenin aıtty, dep habarlaıdy Egemen.kz.
«Bul sala, shyn máninde, aımaqtyń qarqyndy damýy úshin tirek baǵyty bola alady. Biz álemde jańa ekonomıkalyq geografııanyń qalyptasyp jatqanyna kýá bolyp otyrmyz. Qytaı, Eýropa, Reseı, Taıaý Shyǵys baǵyttaryndaǵy saýda-sattyq aýqymy ulǵaıady degen boljam bar. Ortalyq Azııa Soltústik pen Ońtústikti, Batys pen Shyǵysty baılanystyratyn jahandyq joldardyń torabynda ornalasqan. Bul – aımaqtyń keleshegine keń jol ashatyn eleýli artyqshylyǵymyz. Qazirgi kezeńde Transkaspıı halyqaralyq kólik baǵdary erekshe ról atqarady», dedi Prezıdent Ortalyq Azııa memleketteri basshylarynyń V Konsýltatıvtik kezdesýindegi baıandamasynda.
Memleket basshysynyń aıtýynsha, orta merzimdi perspektıvada atalǵan dáliz arqyly júk tasymaldaý kólemi bes ese ulǵaıýy múmkin. Osy tusta Qazaqstan tarapy sıfrlyq sheshimder engizý jáne ınfraqurylymdy jańǵyrtý arqyly onyń ótkizý qabiletin josparly túrde arttyrýǵa nıet bildirip otyr.
«Bizge baýyrlas memlekettermen birlesip, óńir ishindegi saýda-sattyqqa kedergi keltiretin «osal tustardy» retteý úshin kólik jáne logıstıka ınfraqurylymyn damytý jumysyn jalǵastyrý óte mańyzdy. Qazaqstan jaqyn seriktesterimen ekonomıkalyq baılanystardy keńeıtýge yqpal etetin birqatar iri jobany jedel júzege asyrýdy kózdeıdi. Bul jerde «Dostyq – Moıynty», «Baqty – Aıagóz», «Darbaza – Maqtaaral» temirjol jobalary, sondaı-aq «Jańaózen – Túrkimenstan shekarasy» avtomobıl joly týraly sóz bolyp otyr. Jalpy, Qazaqstan Eýrazııanyń tranzıttik haby retinde óz rólin kúsheıtýge nıetti», dep qosty Qasym-Jomart Toqaev.