Memleket basshysy Qasym-Jomart Toqaev Ortalyq Azııa memleketteri basshylarynyń V Konsýltatıvtik kezdesýinde baıandama jasady, dep habarlaıdy Egemen.kz Aqorda baspasóz qyzmetine silteme jasap.
«Ortalyq Azııa» týrıstik brendin birge nasıhattaı otyryp, elderimizdiń biregeı tabıǵatyn jáne ózine tán baı mádenıetin búkil álemge tanystyrýǵa keremet múmkindigimiz bar. Aqparattyq keńistiktegi yntymaqtastyqty jandandyrýdyń perspektıvasy zor. Joǵary sapaly ortaq medıajobalardy júzege asyrý, sonyń ishinde jalpyóńirlik telearna, jańalyqtar saıtyn qurý isine kirisýdi usynamyn. Bul mindetterdiń oryndalýy Ortalyq Azııa elderiniń salalyq vedomstvolary jáne aqparat agenttikteri arasyndaǵy turaqty dıalogqa septigin tıgizedi», dedi Memleket basshysy kezdesý barysynda.
Prezıdent ortaǵa salǵan usynystary Ortalyq Azııa elderi arasyndaǵy qarym-qatynasty jańa sapaly deńgeıge kóterý nıetinen týyndap otyrǵanyn alǵa tartty.
«Qazaqstan óńirdegi yntymaqtastyqty odan ári nyǵaıtýǵa múddeli ekenin taǵy da atap ótkim keledi. Qurmetti áriptester, Sizderdi Ortalyq Azııa memleketteri basshylarynyń Qazaqstanda ótetin 6-shy Konsýltatıvtik kezdesýine shaqyramyn. Aldaǵy mindetterdiń tabysty júzege asyrylýy dostyqty, tatý kórshilik qarym-qatynasty jáne strategııalyq seriktestikti odan ári nyǵaıtýǵa múmkindik beretinine senimdimin», dep túıindedi Memleket basshysy.