Aqtóbede kórnekti memleket jáne qoǵam qaıratkeri Temirbek Júrgenovtyń 125 jyldyǵyna arnalǵan aýqymdy is-sharalar ótti, dep habarlaıdy Egemen.kz.
2023 jyl – TÚRKSOI uıymynyń sheshimimen túrki áleminde Júrgenov jyly bolyp jarııalanǵan edi. Maqsat – 39 jasynda saıası qýǵyn-súrgin qurbany bolǵan qaıratkerdiń qazaq rýhanııaty men Ortalyq Azııa halyqtarynyń bilimi jáne mádenıetin damytýǵa qosqan zor eńbegin nasıhattaý. T. Júrgenov QazASSR Oqý-aǵartý komıssary qyzmetinde júrip, 1937 jyly qýyn-súrginge ushyraǵanǵa deıin eldiń túkpir-túkpirinde mektepter, mádenıet oshaqtary, halyq teatrlaryn ashyp ult mádenıetin kóterýge úlken eńbek sińirdi. Sondaı-aq 1936 jyly Máskeýde Qazaqstan mádenıetiniń onkúndigin ótkizýde aıryqsha uıymdastyrýshylyq qyrymen tanyldy.
T. Júrgenovke arnalǵan is-sharaǵa Almatydan Uzaqbaı Qulymbetovtyń qyzy, Qazaqstannyń eńbek sińirgen qaıratkeri Orynsha Qarabalına-Qazybaeva, Qazaqstan Jazýshylar Odaǵynyń múshesi – Zeınep Ahmetova, QR UǴA akademıgi, tarıh ǵylymdarynyń doktory Hangeldi Ábjanov qatysty.
«T. Júrgenov jáne túrki áleminiń rýhanı biregeıligi» atty ǵylymı konferensııada ǵalymdar 1938 jyly qazaqtyń 19 komıssary bir túnde atylǵan Almaty túbindegi Qandysaıda marqumdardy qaıta jerlep, eskertkish qoıý jáne Aqtóbede Temirbek Júrgenov atyndaǵy mýzeı úıin ashýdy usyndy.
Aqtóbe qalasyndaǵy Uzaqbaı Qulymbetov atyndaǵy №64-shi jáne Baýyrjan Momyshuly atyndaǵy №62-shi mektepterde «Baýkeńniń tálimi» taqyrybynda oqýshylardyń Orynsha jáne Zeınep apaılarmen kezdesýi ótti. 15 qyrkúıekte Teljan Jamanmurynov, Uzaqbaı Qulymbetov, Teljan Shonanulynyń urpaqtary Áıteke bı jáne Yrǵyz aýdandaryna sapar shegip, qýǵyn-súrgin qurbandary bolǵan úsh arysqa týǵan jerinde as bermekshi.