«Astana Opera» ujymynyń Grýzııa elindegi gastroldik sapary 23 qyrkúıek kúni Shota Rýstavelı atyndaǵy Ulttyq memlekettik akademııalyq teatr sahnasynda ótedi dep josparlanyp otyr. «Tbılısıdegi dala úni» atalatyn konserttiń grýzııalyq tyńdarman qaýymǵa usynar jańalyǵy kóp. Alǵash ret Tbılısı tórinde óner kórsetkeli otyrǵan teatr jańa baǵdarlamasymen tyńdarmanyn qýantýǵa asyq.
Grýzııalyq kórermen qaýymdy jetekshi solıster men Qazaqstannyń eńbek sińirgen qaıratkeri Abzal Muhıtdınniń jetekshiligindegi teatrdyń sımfonııalyq orkestri men horynyń oryndaýynda otandyq shyǵarmalardan mýzyka, sondaı-aq álemdik jaýharlarmen umytylmas kezdesý kútedi.
– Jyl sanap «Astana Opera» teatry gastrolderiniń geografııasy keńeıip keledi. Elimizde de, shetelderde de ártisterimiz ben mýzykanttarymyzdy qushaq jaıa ystyq yqylaspen qarsy alady. Sheteldegi árbir óner kórsetý – jaýapty ári tolqynysty oqıǵa. Sebebi biz óz teatrymyzdy tanystyryp qana qoımaı, elimizdiń atynan ónerimizdi pash etip, sheteldikterdi ulttyq mádenıetimizben sýsyndatamyz. Tájirıbede kórinis taýyp otyrǵandaı, álem tyńdarmandarynyń qazaq ónerine degen qyzyǵýshylyǵy aıryqsha. Sondyqtan biz únemi gastrol baǵdarlamasyna otandyq avtorlardyń týyndylaryn engizemiz. Bul – sózsiz-aq uǵysatyn ámbebap mýzyka tilimen óz elimiz týraly aıtýdyń tamasha múmkindigi, – dep atap ótti «Astana Opera» dırektory, Qazaqstannyń eńbek sińirgen qaıratkeri Ǵalym Ahmedıarov.
Grýzııa astanasynda ótetin gastroldik sapardyń kórkemdik deńgeıine jaýapty maman – «Astana Opera» teatry bas dırıjeriniń orynbasary Abzal Muhıtdın qazaq operalarynyń mýzykasy men aspaptyq nómirlerdiń úlken bóliminen turatyn tańǵaldyrarlyq gala-baǵdarlama ázirlemek. Sonymen qatar esimderi dúnıe júzine aıan kompozıtorlardyń operalarynan arııalar men ansamblder shyrqalady.
Maestronyń aıtýynsha, teatrdyń grýzın áriptesteri Manana Gýnııa jáne Alla Sımonıshvılımen kópjyldyq jemisti yntymaqtastyǵy Sh.Rýstavelı atyndaǵy teatrdyń foıesindegi «Pıkkolo teatry» jobasynyń operalarynan kostıýmder kórmesinen jáne konsertte opera-býffanyń sahnalaryn oryndaýdan kórinis tappaq.
– Bizdiń solısimizdiń grýzın operasynan arııany oryndaýy, sondaı-aq dombyranyń oınaýy kópshilik úshin tosynsyı bolady, – dep bólisti Abzal Mırasbekuly.
Teatr ártisteri men mýzykanttarynyń Tbılısı saparyna daıyndyǵy tyńǵylyqty. Grýzııa búkil álemge mýzykaǵa, atap aıtqanda, vokaldy mýzykaǵa degen erekshe súıispenshiligimen tanymal. Baǵdarlamaǵa teatrdyń jetekshi solısteri, Qazaqstannyń eńbek sińirgen qaıratkerleri – Janat Shybyqbaev, Saltanat Ahmetova, Aıgúl Nııazova, Medet Shotabaev, Meıir Baınesh, Qazaqstannyń eńbek sińirgen ártisi Jannat Baqtaı, sondaı-aq halyqaralyq jáne ulttyq baıqaýlardyń laýreattary Gúljanat Sapaqova, Evgenıı Chaınıkov, Tatıana Vısınskaıa, Erjan Saıpov, Artýr Ǵabdıevtiń qatysýy josparlanǵan. Teatrdyń opera trýppasynyń dırektory – Qazaqstannyń eńbek sińirgen qaıratkeri Azamat Jyltyrkózov.
Eske sala ketsek, ótken mereıtoılyq maýsymda «Astana Opera» Mádenıet mınıstrliginiń qoldaýymen Baký, Máskeý, Mınskide, sondaı-aq Polsha men Slovenııada jáne elimizdiń kóptegen óńirinde tabysty óner kórsetip qaıtty.