Eńbek adamdy ósiredi, ómirge qulshynysyn arttyryp, qanattandyrady. Erteńgi kúnge degen senimin nyǵaıtyp, úmitin úkileı túsedi. Tórt múshesi túgel bola tura eńbekke qulyqsyz jandardyń qasynda ózin áldeqaıda baqytty, tabysty, yrysty sezinip, eńbek etý arqyly kóptiń qurmetine bólenip júrgen ismer Gúlim Nurbatyrova osylaı oı túıedi. Sheberligi shyńdalǵan tiginshiniń esimi búginde jurtshylyqqa jaqsy tanys.
On jyldan asa ýaqyt buryn jazıraly Jarkentten kerege taýly Kegenge kelin bolyp, bosaǵa attaǵan Gúlimniń basyna aq jaýlyǵyn salyp, batasyn bergen enesi Zııash apa balalarynyń baqytty bolýyna qoldan kelgen jaqsylyǵyn, qamqorlyǵyn aıamaı, demeý bolýdy óz mindetine alǵan. Alǵashqy kúnnen bastap eńbekke eptiligin ańǵartyp, úı sharýasyn tap-tuınaqtaı etip, qutty ornyna tastaı batyp, sýdaı sińgen Gúlim estý qabiletinen aıyrylǵany bolmasa, esh kemistigin kórsetpeı, el qatarly eńbek etýde aldyna jan salmaıtynyn ańǵartady. Munymen ǵana shektelmeı, on saýsaǵynan óner tamǵan ismer ekenin baıqatady.
«Saýsaq birikpeı, ıne ilikpeıdi» degen támsildi jadyna toqyǵan Gúlim óziniń janyna jaqyn jumyspen jastaıynan aınalysýǵa umtylady. Ata-anasy qyzdarynyń qabilet-qarymyna qaraı oqyp-toqýyna yqpal etip, qamqor bolǵan eken. Sóıtip, Taldyqorǵandaǵy múmkindigi shekteýli jandarǵa arnalǵan mektepte, odan keıin Almaty qalasyndaǵy arnaýly oqý oryndaryn aıaqtap, qolyna arnaıy tiginshi degen sertıfıkatyn alady. Bul sheberqol jannyń ómirden óz ornyn taýyp, halyqqa paıdasyn tıgizýine jol ashady.
«Ulym Medetpen bas qurap, oshaǵymnyń otyn jaqqan kelinimniń minezi jaıly, jaıdary. Ata-anasynyń tálim-tárbıesi ǵoı, óte eńbekqor. Jumysqa degen jaýapkershiligi zor. О́sip-ónip kelemiz. Aıjan, Amanjan, Aızere esimdi úsh nemeremniń ekeýi bastaýyshta oqıdy, kishisi – balabaqshada. Men nemerelerimdi baǵyp-qaǵyp, ulym men kelinimniń alańsyz jumys isteýine qolǵabys etip otyrmyn. О́ıtkeni ekeýiniń alatyn járdemaqylary qaıdan jetsin? Osy kúni azyq-túlik, kıim-keshek túgel qymbat. Kelinim kúndelikti tabysyn taýyp, sol olqylyqtyń ornyn toltyrýǵa tyrysyp, tepeńdep júr. Bul oraıda kásip ashyp, eńbek etem deýshilerge demeý bolyp otyrǵan úkimetke rızamyz. Sonaý 2017 jyly qaıtarymsyz 1 mln teńge berip, soǵan is mashınalaryn, tigýge qajet quraldaryn, ıne-jibin satyp alyp, kásibin ashqan kelinim eldiń aldyna túsip ketpese de, kem qalmaı, tirshiligin jasap keledi», deıdi feldsher bolyp zeınetke shyqqan enesi Zııash Rashqanova.
Tula boıy tuńǵyshynyń atymen atalatyn «Aıjan» tigin sehyna keletin kisi qarasy qaı ýaqytta da úzilmegen.
«Gúlimniń qolynan bári keledi. Bastapqyda kıimderdi qysqartýmen aınalyssa, búginde kórpe, perde tigýdi erkin meńgerip aldy. Kóz jaýyn alatyn quraqtar quraıdy. Balabaqshalardan erteńgilikke qajet kıim tigip berýine suranystar túsedi. Sóıtip, tabandylyǵy men sheberliginiń arqasynda kóptiń kóńilinen shyǵyp, alǵysyn alyp jatady. Tiginshiliktiń qyr-syryn jetik meńgerip alǵan qurbymyzdan bizdiń de úırenerimiz kóp», deıdi bazarda birge jumys isteıtin Márzııa.
Bir jasynan qulaǵynan qulyq aǵyp, sońynda estý qabiletin joǵaltqan Medet Ilipbekov te memlekettik baǵdarlama aıasynda eńbekpen qamtylyp, turaqty tabys taýyp otyr. Taǵdyrdyń jazýyna ókpe artpaı, jaryq dúnıeniń qadirin bilip, ómirdiń qýanyshyn kóbeıtip, yrys-nesbesin arttyryp otyrǵan qos júrektiń maqsaty – ul-qyzdaryn tárbıeli, bilimdi ári eńbekqor etip ósirý. О́ıtkeni adal eńbekpen tapqan nan tátti.
Almaty oblysy