El astanasynda kórnekti jazýshy, dramatýrg, Memlekettik syılyqtyń laýreaty Oralhan Bókeıdiń 80 jyldyq mereıtoıy atalyp ótti. Qalamgerdiń ómiri men shyǵarmashylyǵyna arnalǵan kórmeden bastalǵan is-sharalar legi dóńgelek ústel basyndaǵy rýhanı jıynǵa ulasty. Mádenıet jáne aqparat mınıstrliginiń qoldaýymen Ulttyq akademııalyq kitaphanada ótken «Sholpandaı tań aldynda týyp batty» atty konferensııaǵa mádenıet pen qoǵam qaıratkerleri, zııaly qaýym men qarapaıym oqyrman qaýym qatysty.
Alqaly jıyn basynda Prezıdent keńesshisi Baýyrjan Omarov Memleket basshysy Qasym-Jomart Toqaevtyń konferensııaǵa qatysýshylarǵa arnalǵan quttyqtaý hatyn oqyp berdi.
«Oralhan Bókeı – ult rýhanııatynyń kókjıegin keńeıtýge zor úles qosqan birtýar tulǵa. Qarymdy qalamger ádebıet álemine alǵash qadam basqan sátten bastap shoqtyǵy bıik shyǵarmalarymen oqyrman qaýymnyń yqylasyna bólendi. Jazýshynyń jaýhar muralary kóptegen shet tiline aýdaryldy, pesalary elimizdiń irgeli óner ordalarynda qoıylyp, kórermen kózaıymyna aınaldy. «Altaıdyń Kerbuǵysy» atanǵan erekshe daryn ıesiniń shyǵarmashylyq joly, azamattyq ustanymy jáne qaıratkerlik qasıeti – jastarǵa árdaıym úlgi-ónege. Onyń mol ádebı murasy áli talaı urpaqqa rýhanı azyq bola beretini sózsiz», delingen Prezıdenttiń quttyqtaý hatynda.
Ádebı jıynnyń moderatorlyq tizginin fılologııa ǵylymdarynyń doktory, professor Saýytbek Abdrahmanov ustady.
«Búgin eldiń rýhanııatynda úlken oqıǵa bolyp jatyr. Osy otyrys halqymyzdyń boıyndaǵy asyl qasıetterdi, sóz ónerimizdiń ǵajaıyp syryn asha túspek. Bul – Oralhan Bókeıge arnalǵan kesh. Orekeńe alǵash jolyǵýym ózi qyzyq. Beıne bir keshe ǵana bolǵandaı, áli kóz aldymnan ketpeıdi. 1970 jyl, ol kezde stýdentpin. Jazǵan-syzǵanymdy «Lenınshil jasqa» alyp bardym. Kirgen bette oń jaǵynda kózildirik kıgen bir jigit otyrdy. Ony tanymadym. Al Orekeńdi birden tanyp, jazbamdy soǵan ustattym. Sodan jazǵanymdy aparam da turamyn. «О́tken senbide shyqty ǵoı. Apta saıyn shyqpasań bolmaı ma?» dep qaldy birde Orekeń. Men úndemesten shyǵyp kettim. Bir ýaqytta artymnan álgi kózildirikti jigit ere shyǵyp, meniń kóńilimdi demdedi. Sóıtsem, ol Orekeńniń jaqyn dosy, syılas inisine aınalǵan – Saǵat Áshimbaev eken», dedi Saýytbek Abdrahmanov.
Sondaı-aq jıyn barysynda ǵalym Saǵymbaı Jumaǵul baıandama jasap, qoǵam qaıratkeri, dramatýrg Ermek Amanshaev, abaıtanýshy, fılologııa ǵylymdarynyń doktory Tursyn Jurtbaı, senator Nurtóre Júsip, jazýshylar Aldan Smaıyl, Marat Májıtov, Shárbaný Beısenova, jýrnalıst Jarylǵap Beısenbaıuly, basqa da Oralhannyń kózin kórgen, zamandas bolǵan qalamgerler sóz sóılep, eski jyldardaǵy estelikterimen bólisti.
Kelgen qonaqtarǵa Oralhan Bókeıdiń 80 jyldyǵyna arnalǵan mereıtoılyq medal saltanatty túrde tabystalyp, «Sholpandaı tań aldynda týyp batty» kitabynyń tusaýkeser rásimi ótti. Bul jınaqta jazýshy týraly jazylǵan estelik maqalalar toptastyrylǵan.
Aıta keteıik, jazýshy mereıtoıyna oraı Astanada josparlanǵan is-sharalarǵa muryndyq bolǵan – Aýyldyq aımaqtardy turaqty damytý qory.
«Birneshe jyldan beri Aýyldyq aımaqtardy turaqty damytý qory respýblıka kóleminde kóptegen jobalardy júzege asyryp kele jatyr. Aımaqtardaǵy jobalarymyzda strategııalyq, ekologııalyq, týrıstik baǵytqa basymdyq bergen edik. Bıyldan bastap biz mádenıetke kóńil bólýdi sheshtik. О́ıtkeni turaqty damýdyń negizin bilim berý men ekonomıkalyq damý turǵysynan ǵana emes, ulttyq qundylyqtar jaǵynan da qarastyrýǵa umtyldyq. Osy turǵyda kórnekti jazýshy Oralhan Bókeıdiń mereıtoıyna mán berýdi jón kórdik. Katonqaraǵaıdan bastaý alǵan mereıtoı búginde Astanada jalǵasyn tapty. О́zderińiz biletindeı, mereıtoı Almatyda respýblıkalyq aıtyspen aıaqtalady», dedi Aýyldyq aımaqtardy turaqty damytý qorynyń basshysy Serik Júnisov.
Eske salsaq, Oralhan Bókeıdiń 80 jyldyǵyna arnalǵan is-sharalar jazýshynyń týǵan jeri Shyǵys Qazaqstan oblysyndaǵy Katonqaraǵaı aýdanynan bastaldy. Mereıtoıdy respýblıkalyq kólemde atap ótý Aýyldyq aımaqty turaqty damytý qorynyń uıytqy bolýymen ótip jatyr. Endigi is-sharalar 28-30 qyrkúıek kúnderi Almaty qalasynda jalǵasady.