On eki múshesi saý kezinde adam keleshektegi taǵdyrdyń sybaǵa-syıynyń qandaı bolaryn oılaı bermeıdi-aý. Basyna kún túskende bordaı ezilip, berekesin ketirmeı, qaıta mynaý jaryq dúnıede bir kún bolsa da mazmundy, maǵynaly kún kesheıin dep umtylý úshin kókireginde qushtarlyq, jan-dúnıesinde qajyr-qaırat bolýy kerek eken.
On saýsaǵynan óner tamǵan Evgenıı Bekker de taǵdyr tálkegimen taıtalasamyn dep oılamaǵan. Bári óz yrǵaǵymen ótip jatqan tárizdi edi. Ýrıýpınka selosynyń týmasy kópbalaly otbasynda er jetti. «Balaly úı – bazar» degendeı, úıiniń ishi kúmbirlegen kúmis kúlkige tolyp turatyn, tóńirektiń bári shattyqtyń qushaǵynda, ýaıym-qaıǵynyń qalyń shilterli tory tumshalap kórmegen. Ákesi ómirden erte ótti. Otbasynyń tirenishi de, myqty taıanyshy da áke eken ǵoı. Qaıran da qaıran ákeniń qamqorlyǵynan aıyrylǵan soń esh adamdy aıaýdy bilmeıtin jetimdiktiń tıgen jerin oıyp túser azý tisi aqsıyp, tónip kelgen qapqysy keletindeı me qalaı? Úsh inisi men kishkentaı qaryndasy áke qamqorlyǵyn kórmeı ósti. Taǵdyrdyń salǵan qıyndyǵy jalǵyz asqar taý ákesiz ótý emes eken, munyń mańdaıyna taǵy bir aýyrtpalyq jazylypty. 19 jasynda oılamaǵan jerden jol apatyna ushyrady. Birinshi toptaǵy múgedek bolyp qaldy. Keń dúnıe tarylǵandaı, aǵyn sý toqtaǵandaı. Evgenıı úshin endigi tirliktiń eshbir máni joq tárizdi. Ońashada zilmaýyr qorǵasyndaı qalyń oıǵa berildi. Endi kórgen kúni qalaı bolady. Tórt qubyla tegis qarańǵy. Sol qarańǵylyq qushaǵynan shyǵarar úmit sáýlesi sál ǵana ushqyn shashatyndaı. Keıin oılap qarasa, óz boıyndaǵy qyzyldy-jasyldy tirshilikke degen sheksiz mahabbaty, qushtarlyǵy eken ǵoı. Bir táýiri apatqa ushyraǵansha, orta bilim alǵan. Selodaǵy qyrmanda operator bolyp jumys istegen ári Otan aldyndaǵy áskerı boryshyn ótep, temirdeı tártipke shyńdalǵan. Az da bolsa ómir mektebinen ótip úlgergen.
Aıtpaqshy, áskerde júrgende óz boıynan buryn baıqaı bermeıtin qyzyǵýshylyqty ańǵarǵan. Shyndap shuǵyldansa, kóz jaýyn alatyn ádemi buıymdar jasaı biledi eken.
– Keıde adam beıimi óse kele paıda bolady dep jatady ǵoı. Múmkin solaı da shyǵar, áıteýir ózim talpynyp úırenip kettim, – deıdi Evgenıı.
Qazir ol kózdiń jaýyn alatyn qoıyn dápterler men ártúrli pishindegi qobdıshalar jasaıdy. Zattyń sánine qyzyqqan ári qajetti bolǵandyqtan at-túıedeı qalap alýshylar da az emes. Sheberdiń óz aıtýyna qaraǵanda, aldaǵy ýaqytta ár buıymnyń pishinin jetildire túspek.
Bálkim, shynaıy sheberlik osyndaı tynymsyz eńbekpen joldas shyǵar. Eń bastysy, taǵdyrdyń salǵan synaǵyna moıymaı, tirshiliktiń aqbas tolqyndarymen alysýǵa qaptal jetip jatqan qajyr-qaıratty aıtsańyzshy. Aqjarylyp aıtqan áńgimesinen eshkimge masyl bolýdy qalamaıtynyn ańǵardyq. Qalaı bolǵan kúnde de tula boıynda shymshymdap joq, býyrqanyp turǵan naǵyz erlerge tán qaırattyń bar ekenin jan júregimizben sezindik.
Búgingi tańda Evgenıı Natalıa Nıkolaevnamen birge turady. Múgedektigine baılanysty memleket tarapynan kórsetiletin kómek bar ári anasynyń jan jylýy kókiregin jylytyp, eshteńeden kemdik kóretin jaıy joq. Eń bastysy, ómirge degen qushtarlyq, tirshilikke degen talpynys bar. Al jasaǵan buıymdaryn ótkizý týraly jarnama jasap kórmepti. «El qulaǵy elý» degen ras, osyndaı sheberdiń bar ekeni týraly áńgime el ishine tarap ketken. Jalǵyz qıyndyǵy – qobdıshalar jasaıtyn materıaldardyń tapshylyǵy. Qajetti zattardyń baǵasy ósip, qasqaldaqtyń qanyndaı qat bolyp ketkeli qashan. О́zindik quny ósken soń ústine qolaqysyn kóp qosa almaıdy.
– Aýyldyq jerdegi qarapaıym halyqtyń tabysy onshalyqty qomaqty emes qoı, – deıdi sheber, – qymbatqa satsań qınalyp qalýy múmkin. О́z jaǵdaıymdy da oılaýym kerek. Qajetti shıkizatty arnaýly onlaın dúkender arqyly alyp otyrmyn.
El ishinde janashyr jan az emes. Evgenııdiń qareketin kórgennen keıin oǵan áldebir jomart jan arnaýly kereýet syılapty. Jergilikti «Ýrıýpın ı K» seriktestiginiń dırektory G.Bogına jáne ınvestor P.Kolodıýk kómek qolyn sozyp turady eken.
– Adam kez kelgen qıyndyqqa tózedi. Áıtse de et jaqyn týys pen kóztanystardyń jan jylýy kerek-aq. Erterekte árqıly konkýrstarǵa qatysýshy edim. Eńbegime oraı alǵan dıplomdarym men Qurmet gramotalarym da jeterlik. Eń basty marapat – jurtshylyqtyń qurmeti, deıdi sheber.
Sóz sońynda sheber ózin eshkimniń músirkegenin qalamaıtynyn jetkizdi. Qımyl-qozǵalysy qıyn bolsa da, ór kóńilde ómirge degen ólsheýsiz mahabbat bar. Al mahabbat – bar qıyndyqtyń qursaýyn buzyp-jaryp ketetin qudiretti kúsh. Sol qudiret birinshi toptaǵy múgedektiń qos qoltyǵynan perishtedeı jelep-jebep, alǵa súırep keledi. Jaısań jannyń jan syryn uqqan soń jolyń ashylsyn dedik ishteı biz de kemel kelbetine súısinip...
Aqmola oblysy,
Aqkól aýdany