Almatydaǵy bilim oshaqtarynda qyrkúıektiń orta sheninen bastap ana tilin ardaqtaýǵa shaqyratyn aıshyqty jobalar saltanat qurady. «Til merekesi» qarsańynda úzbeı ótetin dástúrli sharalar shoǵyry bıyl da jalǵasyn tapty. Qalanyń Alataý aýdanyndaǵy №26 orta mektepte ótken «Meniń tilim – uly dala rýhy» atty rýhanı-tanymdyq keshtiń kýási bolyp qaıttyq.
Sahnada sán qurǵan órimdeı órender Abaı, Maǵjan, Qasym, Muqaǵalı shyǵarmalaryn jatqa oqydy. Alash arystarynyń armanyn arqaý etken basqa da óleń jyrlar óne boıyńyzdy shymyrlatpaı kórsin. Kishkentaı júrekterdiń lúpili, týǵan tilge, Otanǵa degen súıispenshiliktiń salmaǵyn arqalap tur dersiz. Mektep oqýshylary men stýdent jastardyń bir sahnada toǵysýyn tanymdyq keshtiń basty ereksheligi dep aıtar edik.
Ál-Farabı atyndaǵy Qazaq ulttyq ýnıversıtetiniń, T.Júrgenov atyndaǵy óner akademııasynyń úzdik stýdentteri izbasar ini-qaryndastaryna ana tildiń qadir-qasıeti, ulttyq dástúrlerdiń ulaǵaty týraly oılaryn aıtyp, óz ónerlerin ortaǵa saldy. О́ner akademııasynyń stýdentteri Altaıdyń asqaq jyrshysy Oralhan Bókeıdiń «Qasqyr ulyǵan túnde» shyǵarmasynan teatrlandyrylǵan kórinis qoısa, Qazaq ulttyq ýnıversıtetiniń jýrnalıstıka fakýltetinde oqıtyn atalǵan mekteptiń túlegi Birlik Ibrahım bastaǵan ónerli jastar ustazdar men oqýshylarǵa umytylmas mereke syılady.
– «Tárbıe basy – til» deıdi Mahmud Qashqarı. Jańa oqý jylyna ere kelgen til merekesi kópultty memleketimizdiń bereke-birligin nyǵaıtatyn, jastardy memleketshildikke, izgilikke tárbıeleıtin mańyzdy kún. Mektebimizde tilimizdi dáripteý maqsatynda «Oqýǵa qushtar mektep» jobasy oqýshylar arasynda ádemi trendke aınaldy. Búgingi is-sharany uıymdastyrǵan qazaq tili men ádebıeti pán birlestiginiń ustazdary bul jobany úılesimdi jolǵa qoıdy. Oqýshylar qazaq aqyn-jazýshylarynyń shyǵarmalaryn jarysa oqyp, túıgen oılaryn bir-birimen bólisip, májilis zalynda ózara pikir almasady. Osylaısha, olar jyl sońyna deıin tom-tom shyǵarmalardy taýysyp, óz til baılyqtaryn damytyp, óristerin keńeıtedi. Táýelsizdik pen til – egiz uǵym. Búgingi is-shara shákirtterimizdi til tazalyǵyn saqtaýǵa, mádenıetti sóıleýge, til janashyry bolýǵa úndeıdi. Oqýshylarǵa jaqsy úlgi kórsetsin degen nıetpen joǵary oqý oryndarynyń ónerli jastaryn arnaıy shaqyrdyq, – deıdi mektep dırektory Galıa Seıtahmetova.
Is-shara barysynda bastaýysh synyp oqýshylarynan quralǵan «Alaý» toby «Ana tili» ánimen kesh shymyldyǵyn ashsa, mekteptiń ónerli óreni Shalqar Súleımenov «Jasa qazaq tili» ánimen jınalǵandardy tánti etti.
ALMATY