Ortalyq Azııadaǵy kıberqaýipsizdik boıynsha «KazHackStan Turan» konferensııasy óz máresine jetti. Aqparattyq jáne kıberqaýipsizdik salasyndaǵy ózekti máseleler kóterilgen alańda 4 myńǵa jýyq sarapshy qatysty. Úsh kúnge sozylǵan aýqymdy is-sharany Sıfrlyq damý, ınnovasııalar jáne aeroǵarysh ónerkásibi mınıstrliginiń Aqparattyq qaýipsizdik komıteti uıymdastyrdy.
«KazHackStan» – tájirıbe almasatyn, aqparattyq jáne kıberqaýipsizdik salasyndaǵy túıtkildi máselelerdi talqylap, sheshý joldaryn usynatyn alań. Bıyl konferensııanyń paneldik sessııalaryna shetelden 30-dan astam spıker shaqyryldy. Olar kıberqaýipterden qorǵaýdyń zamanaýı joldary men ádisterimen bólisti. Alǵashqy kúni «Qazaqstanda jáne óńirde kıberturaqtylyqty qamtamasyz etý» taqyrybyndaǵy plenarlyq sessııada Aqparattyq qaýipsizdik komıtetiniń tóraǵasy Rýslan Ábdiqalyqov adamı kapıtaldy damytý jáne memlekettik saıasatty jetildirý, talaptardy buzýshylarǵa qatysty qabyldanyp jatqan is-sharalar jóninde oı qozǵady.
«Bıyl elimizdiń kıberqaýipsizdigin nyǵaıtýǵa baǵyttalǵan «Kıberqalqan-2.0» baǵdarlamasy iske qosyldy. Biz 2025 jylǵa qaraı aıtarlyqtaı nátıje kútemiz: jahandyq kıberqaýipsizdik ındeksi: top-20 elge kirý. 2025 jylǵa qaraı bizdiń maqsatymyz – «Elektrondyq úkimetti» 100 paıyz qorǵaý. «Kıberqalqan-2.0» baǵdarlamasy elimizdi sıfrlyq álemde qaýipsiz etýge kepildik beredi», dedi komıtet tóraǵasy.
Sondaı-aq konferensııa aıasynda «OSINT jáne Kıberqaýipsizdik: sıfrlyq álemdegi barlaý jáne qorǵaý» taqyrybynda ótken workshop-ta Kıbershabýyldardy taldaý jáne tergeý ortalyǵynyń sarapshysy Vıtalıı Perov sóz sóıledi. Oqytýǵa memlekettik organdar men jeke sektordan 300-den astam qyzmetker qatysty. Olar ashyq barlaý kózi (OSINT) jáne kıberqaýipsizdik ádisterimen tanysty. Vıtalıı Perov óziniń kıberqaýipsizdik salasyndaǵy tájirıbesin bólisip, jelidegi kompanııalar men uıymdar jıi betpe-bet keletin qaýip-qaterlerdi tizbektedi. Spıker kıbershabýyldardyń aldyn alý úshin qandaı qorǵanys sharalaryn qoldanýǵa bolatynyn jáne oǵan qandaı quraldar men tehnologııalar kómektese alatynyn túsindirdi. Buǵan qosa AKT-ny qoldaný arqyly qylmystardy ashý boıynsha «CyberPol»-men birlese júrgizilip jatqan jumystaryn aıtty.
Konferensııaǵa qatysýshylar da ózderiniń jınaǵan bilim-bilikterin, tájirıbelerin jáne ıdeıalaryn ashyq, belsendi túrde bólisti. Kıberqaýipsizdikke qatysty oqytý men damytýdyń ártúrli aspektisine arnalǵan sessııalar osy saladaǵy eń ózekti syn-qaterler men bastamalardy aıqyndady.