Shymkent qalasy Ál-Farabı aýdany ákimdiginiń laýazymdy tulǵasy bıýdjet qarajatyn asa iri mólsherde jymqyrdy degen kúdikke ilindi, dep habarlaıdy Egemen.kz.
Qarjy monıtorıng agenttiginiń málimetinshe, kúdikti óziniń laýazymdyq jaǵdaıyn paıdalana otyryp, qala aýmaǵyndaǵy kópqabatty úılerdiń 150 aýlasyn abattandyrý boıynsha smetalyq qujattamada jumystar men materıaldardyń baǵasyn negizsiz qymbattatqan.
Ol 700 mln teńgeden astam somaǵa asa iri mólsherde bıýdjet qarajatyn jymqyrdy degen kúdikke ilindi. Sot sanksııasymen atalǵan azamat ustalyp, qamaýǵa alyndy. Sotqa deıingi tergeý júrip jatyr.
QR QPK-niń 201-babyna sáıkes ózge aqparat jarııa etilmeıdi.
«QR Konstıtýsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-prosestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi», dep túsindirdi QMA.