Keshe Týrızm jáne sport mınıstri Ermek Marjyqpaev Almaty oblysyndaǵy respýblıkalyq olımpıadalyq daıarlyq bazasynda XIX jazǵy Azııa oıyndaryna qatysatyn Qazaqstan quramasymen kezdesti, dep habarlaıdy Egemen.kz atalǵan vedomstvonyń baspasóz qyzmetine silteme jasap.
Ermek Marjyqpaev sportshylar jáne jattyqtyrýshylar quramymen áńgimelesip, olarǵa sáttilik tiledi. Mınıstr Azııa oıyndarynda tabysty óner kórsetý óte mańyzy ekenin aıtty. Sebebi baıraqty básekede qurlyq chempıony ataǵymen qatar sporttyń 8 túrinen Parıj Olımpıadasynyń joldamasy sarapqa salynady.
«Biz osy sátke deıin uzaq ári aýqymdy jumys atqaryp, óte belsendi daıyndyqty ótkerdik. Keshendi jospar ázirlendi. 400-den astam oqý-jattyǵý jıyndary ótip, túrli týrnırler uıymdastyryldy, sonyń arqasynda bizdiń sportshylar ózderin joǵary halyqaralyq deńgeıde kórsetýge múmkindik aldy. Sanaýly kúnderden keıin sizder basqa elderdiń talantty jáne sheber sportshylarymen básekege túsesizder. Bul ońaı emes, biraq ondaı týrnırlerde minez shyńdalady, qundy tájirıbe jınaqtalady. Barshańyzǵa sáttilik, jiger men tózimdilik tileımin. Baıraqty básekede medaldar, Olımpıadaǵa joldamalar, reıtıngtik upaılar ǵana emes, sonymen qatar el namysy, búkil otandyq sporttyń mártebesi báske tigiledi. Bizdiń mınıstrlik árdaıym otandyq sportshylardy, jattyqtyrýshylardy jáne osy salanyń basqa da mamandaryna qoldaý kórsetedi. Biz álemge elimizdi tanytyp qana qoımaı, óskeleń urpaqqa úlgi kórsetip, sport pen salaýatty ómir saltyna degen qyzyǵýshylyqty oıatamyz. Barshańyzdy úlken sport merekesiniń bastalýymen quttyqtaımyn jáne aldaǵy Azıadada eń bıik shyńdardy baǵyndyrýǵa tilektespin!», dedi Týrızm jáne sport mınıstri Ermek Marjyqpaev.
Eske salaıyq, XIX jazǵy Azııa oıyndary 23 qyrkúıek pen 8 qazan aralyǵynda Qytaıdyń Hanchjoý qalasynda ótedi. 4 jylda bir ret uıymdastyrylatyn jarysqa elimizdiń atynan qatysatyn 524 atlet 30 sport túrinen 305 medal úshin talasady. Qazaqstan quramasy 1994 jyldan beri Azııa oıyndaryna osymen segizinshi ret qatysyp jatyr.
Jarysqa 45 memleketten 15 myńnan astam sportshy qatysyp, sporttyń 40 túrinen jalpy sany 481 medal jıyntyǵyn ózara sarapqa salady.