Qylqalammen tanymal jastardyń portretin aq qaǵazǵa aınytpaı túsiretin Isataı Maıemerovtiń ańsary bala kezinen beıneleý ónerine aýǵan. Qazir ol Mahambet aýdanynyń Jalǵansaı aýylynda turady.
Ata-ana baýyrynan taraǵan bes balanyń biri 2014 jyly Mańǵystaý oblysyndaǵy óner kolledjin sýretshi mamandyǵymen bitirgen. Keıin M.О́temisov atyndaǵy Batys Qazaqstan ýnıversıtetinen beıneleý óneri jáne syzý pániniń muǵalimi mamandyǵyn alyp, týǵan aýylyna oralǵan. Qazir aýyldaǵy «Shalqyma» mádenıet úıinde sýretshi bolyp jumys isteıdi. Aýyl balalary úshin sýret úıirmesin ashyp, 12 órendi beıneleý óneriniń qyr-syryna baýlyp júr.
«Balabaqshaǵa barǵan kezimnen sýret salýdy unatatyn edim. Mektepte túrli sýret baıqaýyna qatystym. Qazir mamandyq tańdaýda qatelespegenimdi bilemin. О́ıtkeni sýretshilik – júrek qalaýym. Ataqty sýretshi Pablo Pıkassonyń «Sýretshi kórgenin emes, sezingenin beıneleıdi» degeni bar. Men de júrekpen sezingenimdi aq qaǵazǵa túsiremin. Qylqalamdy qolyma alyp, tabıǵat kórinisin, tarıhı taqyrypqardy, tanymal adamdardy beınelegen kezde demalamyn», deıdi Isataı Maıemerov.
Ol álemge tanymal tulǵalardyń, ásirese jastardyń portretinen óz kolleksııasyn jasaýǵa bet burǵan. Qazir onyń kolleksııasynda ánshi Dımash Qudaıbergenniń, jekpe-jek sheberi Shavhat Rahmonovtyń, fransýz fýtbolshysy Kılıan Mbappeniń jáne ózge áıgili tulǵalardyń portretimen tolyqqan. Sýret salýmen shektelmeı, mekemeler men balabaqshalar ǵımarattarynyń qabyrǵasyn bezendiredi.
«Sýret salý – tabıǵaty-nan talant daryǵan jandarǵa beriletin kásip. Beıneleý óneri adamdy tylsym álemge jeteleıdi. Sýretshilikti kásip kózine aınaldyryp júrgen óner adamy az emes. Isataı Maıemerovtiń de kásibin násibine aınaldyrýǵa múmkindigi bar. О́nerli jasty qoldaý maqsatynda qaıtarymsyz grant beretin konkýrsqa qatysýǵa keńes berdik. Biz úshin eń bastysy – osyndaı talantty jastardyń aýylda turaqtap qalýyna múmkindik jasaý», deıdi «Atameken» UKP aýdandyq fılıalynyń dırektory Jeksenbaı Pazýlov.
Atyraý oblysy