Tanymal vRINGe saıty orta salmaqta kúsh synasyp júrgen kásipqoı boksshylardyń reıtıngin jarııalady. Myqtylar kóshin qazaqtyń qaısar uly, WBO nusqasy boıynsha álem chempıony Jánibek Álimhanuly bastap tur.
Jánibektiń júrip ótken joly qazaq jankúıerleriniń kóz aldynda. Tanymal jattyqtyrýshy Murat Sıqymbaevtan tálim-tárbıe alǵan Almaty oblysy Alakól aýdany Jylandy aýylynyń týmasy áýeli áýesqoılar arasynda bıik belesterdi baǵyndyrdy. Onyń myqty sportshy bolyp qalyptasýyna kezindegi tanymal bylǵary qolǵap sheberi Qanat Sıqymbaev pen elimizdiń stýdentter quramasynyń bas bapkeri Dastan Sádýaqasovtyń da sińirgen eńbekteri zor. J.Álimhanuly 2013 jyly Ammanda Azııa jáne Almatyda álem chempıony atansa, 2014 jyly Inchhonda ótken Azııa oıyndarynda bas júldeni oljalady. 2016 jyly Rıo-de Janeıroda alaýy tutanǵan Olımpııa oıyndarynda shırek fınalǵa deıin jetti.
Kásipqoılar arasynda Jánibek Álimhanuly 2016 jyldyń kúzinen beri judyryqtasyp júr. Sol kezden beri 14 kezdesý ótkizip, barlyǵynda jeńiske jetti. Toǵyz qarsylasyn sulatyp saldy. 2022 jyly ulybrıtanııalyq Dennı Dıgnýmdy ekinshi raýndta uryp jyǵyp, WBO nusqasynyń ýaqytsha chempıony ataǵyn ıelendi. Bıylǵy jyldyń aqpan aıynda AQSh-tyń ataqty boksshysy Demetrıýs Andrade J.Álimhanulymen aıqasýdan bas tartyp, sonyń saldarynan altyn belbeýden aıyryldy. Osylaısha, qazaq jigiti tuǵyrǵa qondy. Odan keıin ol óz ataǵyn eki ret sátti qorǵady. Byltyrǵy jyldyń 12 qarashasynda Ulybrıtanııanyń taǵy bir ókili Denzel Bentlıdi upaı sanymen utsa, bıyl 13 mamyrda kanadalyq Stıven Batlerdi ekinshi raýndta nokaýtqa jiberdi. Mine, qysqasha baıandasaq, 30 jastaǵy jerlesimizdiń júrip ótken joly osyndaı.
Ekinshi oryndy IBF nusqasynyń chempıony Vınchenso Gýalterı ıelenýde. Onyń da jasy – 30-da. Germanııanyń ókili 22 kezdesýdiń 21-inde jeńis toıyn toılady. Jeti jekpe-jekti merziminen buryn aıaqtady. Taǵy bir báseke teń aıaqtaldy. Bıyl jazda ol Olımpıada chempıony Eskıvo Falkaony upaı sanymen utyp, altyn belbeýdi beline taqty. 14 qarashada dál osy Gýalterı bizdiń Jánibekpen kúsh synasady. Qos sańlaqtyń eki birdeı chempıondyq ataq úshin tartysy AQSh-tyń Tehas shtatyndaǵy Rozenberg qalasynda ótedi.
Sondaı-aq TOP-10 boksshynyń qataryna Karlos Adamek (Domınıkan Respýblıkasy), Krıs Iýbenk, Lıam Smıt, Felıks Kesh (barlyǵy da – Ulybrıtanııadan), Israıl Madrımov (О́zbekstan), Ostın Ýılıams (AQSh) jáne Maıkl Zerafa (Aýstralııa) enip otyr. Al úzdik ondyqty Meıirim Nursultanov túıindeýde. О́ziniń týǵan aǵasy, 2013 jylǵy álem jáne Azııa chempıony Mereı Aqshalovqa eliktep, bylǵary qolǵapty qolyna kıgen ol 2016 jyldan beri kásipqoı rıngte óner kórsetip júr. Sol aralyqta 30 jastaǵy Semeı óńiriniń týmasy 18 ret rıngke kóterilip, barlyq básekesinde basymdyq tanytty. 10 qarsylasyn nokaýtqa jiberdi.