Elimizdiń Qarýly kúshteriniń áskerı qyzmetshileri BUU-nyń áskerı baqylaýshylar kýrsy boıynsha daıarlyqtan ótip jatyr. Úsh aptalyq kýrs polıgondaǵy praktıkalyq sabaqtarmen aıaqtalady. Onda tyńdaýshylar shabýyl, kepilge alý kezindegi áskerı baqylaýshynyń is-qımyl algorıtmin pysyqtaıdy.
Sabaqtar jaýyngerlik qımyldarǵa barynsha jaqyn jaǵdaıda ótip jatyr. Ofıserlerdi kýrstyq daıarlyqtan ótkizýdiń maqsaty – túrli jaǵdaılardy modeldeý jáne áskerı qyzmetshilerdiń ishki jaǵdaıy turaqsyz, daǵdarysqa ushyraǵan elderde bitimgerlik mıssııany oryndaý barysyndaǵy kúızeliske tózimdiligi men áreket etý qabiletin damytý. Sonymen birge áskerı qyzmetshiler áýeden patrýldeý, qoldan jasalǵan jarylǵysh qurylǵylardy tabý, jaralylardy evakýasııalaý, kelissóz júrgizý jáne t.b. tapsyrmalardy oryndaıdy. Kýrstyń baǵdarlamasyn BUU-nyń ártúrli elderdegi bitimgerlik mıssııalaryna qatysqan tájirıbeli nusqaýshylar ázirlegenin aıta ketý kerek. Úsh aptalyq baǵdarlama Bitimgerlik operasııalar ortalyǵynyń bazasynda aprobasııadan ári baǵalaýdan ótedi.
Aldaǵy ýaqytta ortalyq tarapynan Birikken Ulttar Uıymynyń sarapshylaryn kýrsty baǵalaýǵa shaqyrý josparlanyp otyr. Eger baǵdarlama maquldanyp, kýrs akkredıtteýden óter bolsa, bul bizge Bitimgerlik operasııalar ortalyǵynyń bazasynda halyqaralyq deńgeıdegi sertıfıkattalǵan áskerı baqylaýshylardy daıarlaýǵa múmkindik beredi.
Tyńdaýshylar polıgonǵa barmas buryn ofıserlerdiń áskerı baqylaýshy retinde bitimgerlik mindetterdi oıdaǵydaı oryndaý daıarlyqtan qamtamasyz etetin pánder kesheninen ótkenin aıtý kerek. Áskerı qyzmetshiler bitimgerlik qyzmetti, áskerı baqylaýshynyń mártebesi men mindetterin, daǵdarys jaǵdaıyndaǵy is-qımyl tártibin retteıtin halyqaralyq zańnamany, sondaı-aq jergilikti bılik ókilderimen, BAQ-pen jáne qaqtyǵysýshy taraptarmen ózara is-qımyldy uıymdastyrýdy jan-jaqty zerdeledi.
Oqytý kýrsynyń qorytyndysy baqylaý-keshendi oqý-jattyǵýy ótedi. Onda tyńdaýshylar BUU áskerı baıqaýshylarynyń bitimgerlik mindetter keshenin oryndap, olardy iske asyrýdyń túrli tásilin qoldanady.