Isker áıel eskertkishi

Tot baspaıtyn asyl bolattan jasalǵan eskertkish kompozısııasynda beınelengen ulttyq kamzol kıgen, salpynshaq syrǵa taqqan qazaq qyzy granıt tastyń ústinde joǵary qarap qııaldap otyrǵandaı. Bıik ókshe ádemi týflıi, tizesinde turǵan noýtbýk onyń ózine senimdi, isker, alǵyr qalpyn sıpattap tur. Keıip­ker­diń alǵa sozǵan sol qolynyń saýsaǵyna áldebir qus qonaqtaı qalypty.

– Jergilikti isker áıelder keńesiniń ókilderi aqpan aıynda jolyǵyp, Aq Jaıyq óńiriniń isker áıelderi qaýymdastyǵy atynan oblys ortalyǵyna bir eskertkish syıǵa tartqysy kele­tinin aıtty. Árıne, olardyń barlyq tilegin eskere otyryp osy shyǵarmany jasap shyqtyq. Eskertkish «máńgi metall» dep atalatyn materıaldy pisirý ar­qyly jasalǵan. Bul – tot bas­paıtyn, óte berik metall. Muny jasap shyǵýǵa jarty jyldan asa ýaqyt ketti. Músinniń bir búıirine aqyn Munaıdar Balmoldanyń bir shýmaq óleńi jazyldy. Maǵan bul kompozısııanyń turǵan jeri de unap tur: jaqyn mańda iri saýda ortalyǵy bar, adam aıaǵy úzilmeıtin, shýly, is­kerı orta. Osy shyǵarmashylyq jumysymyz arqyly súıikti Oral qalamyzdyń kórkeıe túsýine úles qossaq, nıe­ti­mizdiń aqtalǵany dep bile­miz, – deıdi músinniń avtory, Sýret­shiler odaǵynyń múshesi Erǵalı Bekeshov.

Elordadaǵy «As­ta­nanyń qurdasy» keshe­ni­niń avtory Erǵalı Bekeshovtiń qolynan shyqqan erek­she músinder Oral men Aqsaı qala­larynda, óńirdegi aýdan ortalyqtarynda kópshiliktiń kózaıymyna aınalǵan. Al dál osy jańa músinniń shy­ǵynyn Lıana Tursynova, Darıǵa Jumageldıeva, Balzııa Eveneeva, Toǵjan Babıeva, Aına Baemırova, Dınara Qazıeva syndy isker qyz-kelinshekter jáne Batys Qa­zaq­stan oblystyq Qo­ǵamdyq ta­­maqtandyrý qaýym­das­tyǵy kó­te­­­ripti.

– Bizdiń keńestiń quramynda 2 500-deı kásipker qyz-kelinshek bar. Búgingi eskertkish óńir eko­no­mıkasynyń damýyna úles qo­syp júrgen isker áriptesterime laıyqty tartý dep oılaımyn, – deıdi Batys Qazaqstan oblystyq isker áıelder keńesiniń tóraǵasy Lıana Tursynova.

Batys Qazaqstan oblysy