Buǵan deıin jazǵanymyzdaı, Nıý-Iorkte BUU Bas Assambleıasynyń 78-sessııasy aıasynda Qazaqstannyń tóraǵalyǵymen Azııadaǵy ózara is-qımyl jáne senim sharalary keńesi (AО́SShK) Syrtqy ister mınıstrleriniń beıresmı jıyny uıymdastyryldy. Jıynda Azııa keńesin transformasııalaýdyń jol kartasy maquldandy. Bile bilsek, bul – uıymnyń jahandyq mártebesin kóterip, deńgeıin arttyratyn biregeı qadam.
AО́SShK Bas hatshysy, Elshi Qaırat Sarybaıdyń aıtýynsha, bul jerdegi transformasııa – Azııa keńesin tolyqqandy halyqaralyq óńirlik uıym retinde nyǵaıtýǵa baǵyttalǵan keńeıtilgen reformalar kesheni. Mınıstrler keńesi osy bir mańyzdy qujatty biraýyzdan maquldady.
– Azııa keńesin transformasııalaýdyń strategııalyq mańyzy zor. Bul degenimiz – Azııanyń jahandyq rólin kúsheıtý ári múshe-memleketter arasyndaǵy yntymaqtastyqty jańa bıikterge jeteleý. Qabyldanǵan jol kartasy bizdiń uıymdy birtindep qurylymdyq turǵydan ózgertýge baılanysty týyndaıtyn máselelerdi talqylaý men sheshim qabyldaýdyń basty qujaty. Bul uıym jarǵysyn jasaý, Azııa keńesi aıasynda yntymaqtastyqtyń jańa baǵyttaryn zerdeleý, bıýdjettik jáne kadrlyq reformalardy júzege asyrý, sondaı-aq basqa da máselelerdi qamtıdy. Azııa keńesi osyndaı órkendi ózgeristerdiń nátıjesinde múshe-memleketter arasyndaǵy aldaǵy yntymaqtastyqtyń jan-jaqty baǵyttaryn naqtylaı túsýge ári ózara is-qımyldyń uıymdyq jáne ınstıtýsıonaldyq bazasyn nyǵaıtýǵa umtylady, dep naqtylady Qaırat Sarybaı.
Nıý-Iorkte qabyldanǵan sheshimde Azııa keńesiniń aǵa laýazymdy tulǵalar komıtetine berilgen transformasııalaýdyń jol kartasynyń barlyq elementin talqylaýdy odan ári jalǵastyryp, Mınıstrler keńesi nemese Sammıt sheshim qabyldaýy úshin usynymdar berý jónindegi tapsyrma kórinis tapqan. Bas hatshy retinde Q.Sarybaıǵa múshe-memleketterdiń kelissózder úderisin úılestirý men ilgeriletýde tóraǵalyqqa qoldaý kórsetý tapsyrylyp otyr.
– Mınıstrler keńesi turaqty damý maqsatynda eriktiler qozǵalysyn ilgeriletý jóninde málimdeme jasaǵanyn atap ótkim keledi. Bul qujat Azııa keńesine múshe memleketterdiń turaqty ári jarqyn keleshekke qol jetkizýine oń áserin tıgizetin eriktilerdiń kúsh-jigerin odan ári damytýǵa ári járdemdesýge degen qulshynysyn kórsetedi. Muny Azııa keńesi aıasyndaǵy yntymaqtastyqtyń múldem jańa baǵyty dep ataýǵa bolady. Sonymen qatar mundaı bastamalar mádenıetaralyq dıalogtiń damýyna jáne bizdiń halyqtarymyz arasyndaǵy senim men toleranttylyqty nyǵaıtýǵa septigin tıgizetini sózsiz. Azııa keńesi volonterlik qozǵalystyń baǵdarlamalary men jobalaryn ilgeriletý, olardyń jumysy úshin qolaıly jaǵdaı týdyrý, tehnıkalyq daǵdylardy damytýdy kózdeıtin trenıngter men kýrstardy kóbeıtý arqyly eriktilerdiń Azııanyń kemel keleshegin qalyptastyrýǵa baǵyttalǵan áleýetin tolyq paıdalanýda mańyzdy oryn alady degen úmittemin, – dedi AО́SShK Bas hatshysy.
Sondaı-aq jıynda Mınıstrler keńesi taǵy bir mańyzdy sheshim qabyldy. Bul – Bas hatshynyń orynbasaryn úsh jyl merzimge taǵaıyndaý týraly sheshim. «Qytaı usynǵan Chjan Lıng hanym osy laýazymda bolǵan Chı Fan hanymnyń ornyn basady. Ekeýi de – Qytaı Syrtqy ister mınıstrliginiń tájirıbeli dıplomattary. Jalpy, Qytaı – Azııa keńesi úderisiniń eń belsendi jaqtaýshylarynyń biri. Men múshe memleketterdiń osy joǵary laýazymda sabaqtastyqty qamtamasyz etkenine qýanyshtymyn», dedi Qaırat Sarybaı.
Qysqasy, Azııadaǵy ózara is-qımyl jáne senim sharalary keńesin transformasııalaýdyń jol kartasynda joba-josparlar júzege asqanda uıymnyń jahandyq róli de arta túsedi. Qujatta qamtylǵan reformalar nátıjesinde Azııa keńesi elderdi beıbitshilik, yntymaqtastyq, qaýipsizdik, damý jolynda biriktiretin eń tıimdi alańǵa aınala túspek. Tıisinshe, onyń halyqaralyq bedeli de óseri anyq.