«Kitap-Amanat» jobasy otandyq ádebıetke degen qyzyǵýshylyqty arttyrýǵa, jurtshylyqty oqýǵa yntalandyrýǵa, otandyq avtorlar men kitap shyǵarýshylardy qoldaýǵa baǵyttalǵan. Jýyrda partııanyń Almaty qalalyq fılıalynda jobanyń tusaýkeseri ótti.
Is-sharaǵa qatysqan Parlament Májilisiniń spıkeri, «Amanat» partııasynyń tóraǵasy Erlan Qoshanov kitap adam ómirinde aıryqsha oryn alatynyn atap ótip, jańa jobanyń ereksheligine toqtaldy.
«Memleket basshysy Túrkistanda ótken Ulttyq quryltaıda óskeleń urpaqtyń tárbıesi men bilimine, ulttyq múddege saı keletin kitaptar basyp shyǵarýǵa erekshe nazar aýdardy. Ol kitap shyǵarý isi ıdeologııalyq jumystyń basty baǵyttarynyń biri ekenin atap ótti. «Amanat» partııasy Prezıdenttiń osy bastamalaryn júzege asyrý úshin barlyq óńirlik fılıalda «Kitap-Amanat» kitap dúkenderin ashady. Ol tek kitap satatyn oryn emes, sonymen qatar naǵyz mádenı-aǵartý ortalyǵy bolady», dedi Erlan Qoshanov.
Máselen, «Kitap-Amanat» dúkenderinde otandyq jazýshylar, avtorlar, baspagerlerdiń qatysýymen túrli is-sharalar, jańa kitaptardyń tusaýkeseri men talqylaýlary ótedi jáne taǵy basqa is-sharalar uıymdastyrylady. Joba elimizdegi qazirgi zaman avtorlarynyń shyǵarmalaryn ǵana emes, jalpy otandyq ádebıetimizdi ilgeriletýdi kózdeıdi.
«Keıingi ýaqytta ǵylymı jáne bilim berý mazmunyndaǵy kóp ádebıet qazaq tiline aýdaryldy. Bul kitaptardyń sapasy da, mazmuny da jaqsy. Alaıda taralymy az bolǵan soń, oqyrmannyń bárine birdeı jete bermeıdi. «Kitap-Amanat» jobasy osy olqylyqtyń ornyn toltyrady. Osylaısha, biz jazýshylar men baspagerlerge qoldaý kórsetemiz, otandastarymyzdy kitap oqýǵa yntalandyramyz deýge bolady», dep atap ótti Erlan Qoshanov.
Jańa joba aıasynda «Amanat» partııasy men Baspagerler, polıgrafıster jáne kitap taratýshylar qaýymdastyǵy arasynda ózara yntymaqtastyq týraly memorandýmǵa qol qoıyldy. Qujat baspahanalardyń dúkenderdi qoljetimdi baǵadaǵy tıisti kitap qorymen qamtamasyz etedi. Mundaı shyǵarmalardyń arasynda tek otandyq ádebı týyndylar ǵana emes, álemdik bestsellerler de bolady.
Is-shara barysynda partııa tóraǵasy jas oqyrmanmen áńgimelesti. Sondaı-aq kezdesýge belgili otandyq avtorlar men baspagerler Ádil Qoıtanov, Shyńǵys Muqan, Raısa Qadyr, Almas Saqbaev, Baqytjan Buharbaı taǵy basqalar qatysty.