Batys Qazaqstan oblysynda «Aýyldyq densaýlyq saqtaýdy jańǵyrtý» ulttyq jobasy aıasynda ekinshi nysan paıdalanýǵa berildi.
Memleket basshysy Qasym-Jomart Toqaevtyń byltyrǵy Joldaýynda aýyl medısınasyn damytý jóninde naqty tapsyrma bergen edi. Ulttyq joba aıasynda Batys Qazaqstan oblysynda 2025 jylǵa deıin aýyldyq eldi mekenderde alǵashqy medısınalyq-sanıtarlyq kómek kórsetetin 50 nysan – dárigerlik ambýlatorııa, feldsherlik-akýsherlik pýnkt, medısınalyq pýnkt qurylysy josparlandy. Osy maqsatty júzege asyrý úshin 2023 jyly respýblıkalyq bıýdjetten 3,6 mlrd teńge qarjy bólinip, josparlanǵan 24 nysannyń 12-siniń qurylysy bıyl bastalyp ketti.
Aýyl halqy asyǵa kútken alǵashqy nysan Terekti aýdanyna qarasty Barbastaý aýylynda jaqynda ǵana qoldanysqa berilgen edi. Sý jańa ǵımaratqa ıe bolǵan aýyldyq feldsherlik-akýsherlik beketke Terekti aýdandyq aýrýhanasynyń qarajaty esebinen sanıtarlyq avtokólik satyp alyndy.
«Atalǵan is-sharalardyń barlyǵy da halyqtyń ıgiligi úshin, olardyń ál-aýqatyn arttyrý maqsatynda jáne sapaly medısınalyq kómek kórsetýge baǵyttalǵan. Osy arqyly aýyl turǵyndarynyń densaýlyǵyn nyǵaıtý, saýyqtyrý jumystaryn ýaqytyly qabyldaý, onkologııalyq aýrýlardy erte satyda anyqtaý, skrınıng tekseristeriniń ýaqytyly júrgizilýi, ómir súrý uzaqtyǵyn arttyrýǵa úlken septigin tıgizedi», deıdi Batys Qazaqstan oblystyq Densaýlyq saqtaý basqarmasy basshysynyń orynbasary Gúlnár Ábdirahmanova.
Barbastaýlyqtardyń qýanyshy jýyrda kúni Báıterek aýdanyndaǵy Qaınar aýylynda jalǵasty. Oblys ortalyǵynan 40 shaqyrym qashyqta jatqan shaǵyn aýyl turǵyndary buǵan deıin sál-pál syrqaty úshin qalaǵa sabylatyn. 720 turǵyny bar aýylda salynǵan sý jańa ǵımaratqa 160 mln teńge qarajat jumsalypty. Nysan qajetti medısınalyq qondyrǵylar men quraldar, jıhaz jáne keńse tehnıkasymen tolyq jabdyqtalǵan. Ortalyqtandyrylǵan sý qubyry, tabıǵı gaz jáne avtonomdy jylytý júıesi qosylǵan bekette feldsher, akýsher, sanıtar jáne tehnıkalyq qyzmetker jumys isteıdi. Jaqynda medbıke shtatyn engizý josparlanǵan.
«El damýynyń basty arqaýy – deni saý ult. Halyq densaýlyǵyn jaqsartý – elimiz úshin ózekti máselelerdiń biri. Memleket basshysy el halqynyń, sonyń ishinde aýyl turǵyndarynyń saýlyǵyna erekshe kóńil bólip otyr. Prezıdenttiń tapsyrmasyn oryndaý maqsatynda Qaınar aýylynda jańa feldsherlik-akýsherlik beket ashyp jatyrmyz. Bul aýyl halqynyń densaýlyǵy úshin paıdasy kóp bolady degen oıdamyz. Bul másele kópten beri kóterilip júrgenin bilemiz. Endi aýyl halqy em alý úshin aýdan ortalyǵyna ne Oral qalasyna barmaıdy. Barshańyzdy jańa nysannyń ashylýymen quttyqtaımyn», dedi Qaınar aýyly turǵyndarynyń qýanyshyn bólisýge arnaıy kelgen Batys Qazaqstan oblysynyń ákimi Narıman Tóreǵalıev.
Jańa ǵımaratta tekserý bólmesi, feldsher men akýsherdiń kabınetteri, fıltr, ızolıator, ekpe kabıneti qarastyrylǵan. Sondaı-aq qyzmetke qajetti gınekologııalyq kreslo, quraldardy jýý jáne zararsyzdandyrý quraly, naýqastyń úıine barǵanda qajetti quraldar salynǵan medısınalyq qobdısha qamtylǵan.
Árıne, jańa nysannyń ashylǵanyna erekshe qýanǵan aýyl turǵyndary osyndaı qamqorlyǵy úshin Memleket basshysyna, oblys basshylaryna alǵysyn jaýdyryp jatty.
2025 jyldyń sońyna sheıin bizdiń oblysta osyndaı sý jańa 50 nysan paıdalanýǵa beriledi. Sonyń ishinde bıyl 12 mekeme salynyp bitedi. Búgingi ǵımarattyń qurylysyn «Altaır» kompanııasy júrgizdi. «Qurylys óte sapaly salynǵan, biz ony qatań baqyladyq. Jańa ǵımaratta qajetti qondyrǵylar, jumysqa qajetti barlyq nárse qamtylǵan», deıdi oblystyq densaýlyq saqtaý basqarmasynyń basshysy Erlan Toqsanov.
Batys Qazaqstan oblysy