Kóksý aýdanynyń qareketi kóńil súısindiredi. Aýdan ortalyǵynda turǵyndardy kópten tolǵandyrǵan gazdandyrý máselesi tolyq sheshildi. Balpyq bı aýylynda jańadan boı kótergen «Bereke» shaǵyn aýdanynda ornalasqan kópqabatty turǵyn úılerdiń deni gaz jelisine qosylǵan. Tek Myrzabekov kóshesindegi kópqabatty 3-úıdiń turǵyndary kógildir otyndy paıdalanýdy kópten armandap júrgen edi.
Gaz jelisi úı irgesine jaqyn ornalasqanmen turǵyndarǵa túk paıda bolmady. Bul úıdegilerdiń jelige óz kúshimen qosylýǵa da múmkindigi tómen edi. Sebebi turǵyndardyń deni – áleýmettik azqamtylǵan, kóp balaly otbasylar. Nátıjesinde, irgedegi ıgilikke qol jetkize almaǵan soń aýdandaǵy atqaminerlerge qanshama ret máselesin daýlap barypty. Sheshimdi jol tabylmaǵan soń aýdanǵa issaparmen kelgen oblys basshysyna jan aıqaıyn jetkizgen. О́ńir halqynyń áleýmettik máseleleriniń túıinin tarqatýda utymdy sheshim qabyldaıtyn aımaq basshysy jergilikti atqaminerlerge qaıyrymdy azamattar taýyp, gazdandyrý máselesin sheshýdi tapsyrǵan.
Sodan jergilikti ákimdiktegiler «BSPCROUP LTD» JShS-men kelisip, nátıjesinde, seriktestik óz qarjysy esebinen 50 páterlik kópqabatty turǵyn úıge gaz jelisin tartyp bergen. Qaıyrymdylyq úshin jumsalǵan qarjy – 2,5 mln teńge. Turǵyndardy quttyqtaı kelgen aýdan ákimi Marlen Kólbaev aıtýly máseleni sheshýge atsalysqan seriktestik basshylyǵyna alǵysyn bildirdi.
«Bul kópqabatty turǵyn úıdiń gaz jelisine qosylyp, kógildir otynnyń ıgiligin kórýine birden-bir sebepker – Aıman Toıshybekova apamyz. Oblys ákiminiń qabyldaýynda bolyp, kóptiń máselesin sheshýge septesýin suraǵan. Oblys basshysy bizge tapsyrma júktep, túıtkildi tarqatýdy tapsyrdy. Nátıjesi – osy. Jalpy, Kóksý aýdanynyń turǵyndary jaıly ómir súrýi úshin bar jaǵdaıdy jasaımyz. Keler jyly Balpyq bı aýylynyń turǵyndary tolyqtaı jyly sý jelisine qosylady. Bul baǵytta jobalyq-smetalyq qujat ázirlenýde. Memleket basshysy «Barshaǵa birdeı múmkindik berý – reformanyń basty maqsaty», degen edi. Prezıdent júktegen mindetter oryndalyp, árbir kóksýlyq qolaıly ortada ómir súretin jaǵdaıǵa qol jetkizemiz», dedi aýdan ákimi.
Sáýle Tántibaeva kópten kútken ıgilikke qol jetkizgenine baladaı qýanyp júr. Aıtýynsha, osyndaı qaıyrly azamattar kóp bolsa, elde júzege asqan ońtaıly ister artady eken. «Aýdan basshylyǵyna, qaıyrymdy azamattarǵa alǵaýsyz alǵys bildirý azdyq etedi. Kóptiń tileýin oryndaǵan jandarǵa basymdy ıemin. Jergilikti ákimdiktegiler aldaǵy ýaqytta kópqabatty turǵyn úıdiń aýlasyn abattandyramyz dep otyr. Qalaısha baladaı qýanbasqa», dedi qýanyshyn jasyrmaǵan turǵyn.
Al Aıman Toıshybaeva bul turǵyn úıge gaz qosý aýdan ákimdigine Marlen Kólbaev jaıǵasqaly jasalyp jatqan óristi tirliktiń kishkentaı pushpaǵy ekenin atap aıtty.
«M.Kólbaev ǵımaratqa qamalyp otyrýdy jany súımeıtin, halyq ortasynda júrýge mashyqtanǵan Ádiletti Qazaqstannyń ákimi ǵoı. Kóptiń sózine qulaq túre biledi. Aýdanymyzdy gúldendirgenimiz úshin alǵys bildiremiz», dedi A.Toıshybekova.
Jalpy, Kóksý aýdanynda gazdandyrý jumystary – qarqyndy. Jyl sońyna deıin aýdanda kógildir otynǵa qosylǵan aýyldardyń qatary tolyǵady. Aýdandyq turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspeksııasy bóliminiń basshysy Madı Káribaevtiń aıtýynsha, jyl sońyna deıin segizinshi aýyl bolyp Musabek eldi mekeni kógildir otynǵa qol jetkizbek. Sonymen qatar jýyq arada aýdan ortalyǵyndaǵy 2 jáne 5 qabatty 60 úıdi gazdandyrýǵa jobalyq-smetalyq qujattar ázirlenedi.
Jetisý oblysy