Almatyda kórnekti jazýshy, dramatýrg, jýrnalıst Oralhan Bókeıdiń 80 jyldyǵyna oraı «О́r Altaıdyń asqaq jyrshysy» atty konferensııa ótti. Konferensııa aıasynda jazýshynyń ómiri men shyǵarmashylyǵyna arnalǵan kitap kórmesi uıymdastyrylyp, sýretshilerdiń týyndylary tanystyryldy, dep habarlaıdy Egemen.kz.
Qalamgerdiń mereıtoıyn atap ótý úshin elimizdiń mádenıet pen qoǵam qaıratkerleri, jazýshylar men zııaly qaýym ókilderi Ulttyq kitaphanada bas qosty.
«Oralhan Bókeıdiń 80 jyldyǵyna arnalǵan sharalar jazýshynyń týǵan jerinen bastaldy. Qatonqaraǵaıda úlken alaman báıge ótkizip, Shyńǵystaıda qalamgerdiń mýzeıin ashtyq. Astanada uıymdastyrylǵan mereıtoılyq konferensııa, endi mine, Almatyǵa jetip otyr», dedi Oralhan Bókeı mereıtoıyn uıymdastyrý komıtetiniń múshesi Dáýlet Áshimhan.
Jıynda Qazaqstannyń eńbek sińirgen qaıratkeri, fılologııa ǵylymdarynyń doktory Nurdáýlet Aqysh «Kesteli sózdiń Kerbuǵysy», fılologııa ǵylymdarynyń doktory, ádebıettanýshy Gaýhar Baltabaeva «Oralhan Bókeıdiń prozasyndaǵy táýelsizdik ıdeıasy» taqyrybynda baıandama oqydy. Kádirbek Segizbaı, Beksultan Nurjeke, Ulyqbek Esdáýlet, Maǵıra Qojahmetova, Álibek Asqarov, Ámirhan Meńdeke, Bıgeldi Ǵabdýllın, Júsipbek Qorǵasbek jáne Toqtarbek Maǵzumov bastaǵan Qazaqstan jazýshylar odaǵynyń músheleri mereıtoılyq sharada sóz sóılep, jazýshyny eske aldy.
«Oralhandy qaıtalap oqyǵan saıyn jańa qyry ashyla túsedi. Ol óz arman-tileginde «Qazaǵymyzdyń qadir-qasıetin tómendetpeı, asqaqtataıyq, aǵaıyn!» degen ultjandy oı aıtady. Sondyqtan bul mereıtoıdy atap ótýdiń astary tereńde jatyr», dedi fılologııa ǵylymdarynyń doktory, ádebıettanýshy Gaýhar Saıadilqyzy.
Konferensııada sóz alǵan qalamgerdiń jıeni Klara Nurjaqypqyzy bala kezinen Oralhan shyǵarmalarymen sýsyndap óskenin aıta kelip, onyń búkil qazaqtyń maqtan tutar tulǵasy ekenin jetkizdi. Sondaı-aq ol aımaqtan ǵana bastaý alǵan sharanyń memlekettik deńgeıde qoldaý tapqanyna óz rızashylyǵyn bildirdi.
«Oralhan Bókeıdiń 80 jyldyq mereıtoıyn abyroımen ótkizý – biz úshin úlken jaýapkershilik. Muny ózimizge amanat etip júktedik. Almaty – jazýshynyń jastyq shaǵy ótken qala. Sol úshin mereıtoıdyń qorytyndy sharalaryn osynda ótkizýdi uıǵardyq. Erteń qalamger rýhyna arnap as berilse, kelesi kúni respýblıkalyq alaman aıtys bolady. Barshańyzdy sonda kútemiz», dedi Aýyldyq aımaqtardy turaqty damytý qorynyń basshysy Serik Júnisov.
Aıta ketsek, bas júlde qory 2 500 000 teńgeni quraıtyn aqyndar aıtysy 30 qyrkúıek kúni «Alataý» teatrynda ótedi. Kirý tegin. Qalamgerdiń mereıtoıyn respýblıkalyq kólemde atap ótý úshin Qatonqaraǵaı kásipkerleri qoldaý kórsetip otyr.