Qarttar kúni – aǵa býynǵa rızashylyǵymyzdy bildirip, shynaıy kóńil bólýimizge múmkindik berip qana qoımaı, olardyń qajettilikterine nazar aýdarýǵa jaqsy sebep. Qarııalardy qoldaý, olarǵa qamqorlyq kórsetý – aǵa býynǵa kórsetken paryzymyzdyń az ǵana bóligi. Osy oraıda «Ardagerler uıymy» respýblıkalyq qoǵamdyq birlestigi jyldaǵy dástúri boıynsha «Qarttarǵa qamqorlyq» aksııasyn uıymdastyryp otyr.
Memleketimiz qart adamdarǵa degen qamqorlyqty ekonomıkalyq daǵdarys kezinde de toqtatqan emes. Degenmen elimizde áli de bolsa áleýmettik kómekke muqtaj egde tartqan adamdar bar. Ardagerler uıymy osyndaı qarııalardy nazardan tys qaldyrmaı, jan-jaqty qoldaý kórsetýge úndep otyr.
«Keıbir qarııalar jasy ulǵaıǵan shaǵynda jan jylýy men meıirimge zárý. Barlyq azamatty, jumys berýshilerdi, bıznes qurylym ókilderin aǵa býynnyń el ıgiligine qosqan eseli eńbegin ulyqtaýǵa, «Qarttarǵa qamqorlyq» aılyq aksııasyna atsalysýǵa shaqyramyz. Respýblıkamyzdaǵy atqarýshy organdardy, jumys berýshilerdi, bıznes qurylymdaryn, eriktilerdi, qarııalarǵa, ásirese múgedek ardagerlerge, jalǵyz ilikti zeınetkerlerge, az qamtylǵan qarttarǵa arnaıy kóńil bólýge úndeımiz. Olarǵa materıaldyq turǵydan qolushyn sozýǵa, áleýmettik-turmystyq jaǵdaılaryna qoldaý kórsetýlerińizdi suraımyz. О́z eliniń patrıoty retinde aksııaǵa beıjaı qaramaıtyn azamattar jergilikti ákimdiktermen, óńirlik ardagerler keńesterimen baılanysqa shyǵyp, úles qosady degen úmittemiz», delingen atalǵan uıymnyń habarlamasynda.