Japonııanyń bas shahary – Tokıodaǵy 11 myń kórermenge arnalǵan áıgili «Rıogoký Kokýgıkan» stadıonynda jalaýyn kótergen sýmo kúresiniń kúzgi týrnıri óz máresine jetti. Bul básekede qazaq balýany Ersin Baltaǵul da bar.
Elıtaly sýmo kúresiniń kúzgi chempıonatynda japon balýany ozekı dárejeli Takakeıshıo jeńimpaz atanyp, karerasynda osymen tórtinshi ret Japonııa ımperatorynyń kýbogin ıelendi. Básekeniń fınalynda Takakeıshıo 21 jastaǵy otandasy Atamıfýjıdi qapy qaldyrdy. Al joǵary dıvızıonda beldesip, «Kınbozan» laqap atymen kúnshyǵys elinde tanylyp kele jatqan otandasymyz Ersin Baltaǵul da úzdikter qatarynan kórindi. Bul dıvızıonda ozekı dárejeli Hoshıorıý, Kırıshıma, sekıvake dárejeli Daıeıshıo, Asanoıama syndy japon kúresiniń jampozdary bar. Ersin bıyl alǵash ret kóktemde «Harý bashıoda» týrnırinde kúresip, jarysqa qatysqan balýandar arasynda úzdik tórttiktiń qatarynan kóringen edi. Jýyrda kúnshyǵys elinde kúresip júrgen qazaq balýanymen habarlasyp, báseke týraly sóılesken edik. Ersin otandastarynyń ystyq qoldaýyn sezinetindigin jetkizdi.
«Qoldaýlaryńyzǵa rahmet. Básekeden keıin ári-beri shapqylap, endi bosap jatyrmyz. «Akı bashıo» saıysyn, Allaǵa shúkir, jaqsy aıaqtadyq. Árıne, ár nátıjeli jarystan keıin sýmo kúresiniń zańy boıynsha balýandardyń dárejesi kóterilip otyrady. Men qazir «maegashıra 10» degen dárejede turmyn. Endi buıyrsa, «maegashıra 7» degen dárejege deıin kóterilemin», dedi Ersin Kınbozan.
Sýmo kúresindegi dárejeler qandaı mańyzǵa ıe ekeni oqyrmanǵa túsinikti bolýy úshin olardyń qandaı syı-sııapat alatyny jaıly aıta ketken jón. Mysaly, joǵary dıvızıonda beldesetin balýandar aı saıyn aılyq alyp otyrady. Ekozýna (chempıon) – 2 820 000 ıen (9 078 623,40 teńge), ozekı – 2 350 000 ıen (7 565 519), sekıvake – 1 640 000 ıen (5 279 766), komýsýbı – 1 290 000 ıen (4 152 987 tg), maegashıra – 1 160 000 ıen (3 734 469), jýrıo – 1 100 000 ıen (3 541 307 teńge). Buǵan qosa ár bashıodadan keıin beriletin qomaqty syılyqtar bar. О́ıtkeni sýmo – óte kúrdeli sport túri.
Ersin bıyl alǵash ret kóktemde «Harý bashıodada» kúresip, 11-4 degen nátıjemen úzdik tórttiktiń qataryna bir-aq shyqqan. Al budan keıingi nasý bashıoda kerisinshe 4-11 bolsa, nagoıa bashıoda 7-8, al bul jolǵy Akı bashıoda 9-6 nátıje kórsetti. Al sport jankúıeri Anyq Kókenaıdyń aıtýynsha, Ersin eki jarystan keıin boıyn túzep alǵan, endi onyń jeńisti joly jalǵasady.
«Ersinniń burynǵy kúresin tappaı qalǵan edik. Alaıda boıyn qaıta jınap, kúzgi bashıodada myqty óner kórsetti. Jeńiske degen senimi mol boldy. Jarysty 8-orynmen aıaqtady. Bul – qazaq sýmoshysy úshin asa joǵary kórsetkish. Degenmen Ersin ustasyp kúresýde osaldyq tanytyp júr. Al fýnksıonaldyq, psıhologııalyq turǵyda myǵym. Osy qarqynynan taımasa, aldaǵy bir-eki jylda jeńis tuǵyrynan kórineri sózsiz. Qazaqtan shyqqan tuńǵysh ozekı, tipti ıokozýna bolady degen senimimiz mol», dedi ol.