Keshe AQSh-tyń Nevada shtatyndaǵy Las-Vegas qalasynda kásipqoı boks keshi ótti. Sol básekede eki otandasymyz kásibı sharshy alańdaǵy kezekti jekpe-jekterin ótkizdi.
Meksıkalyq Saýl «Kanelo» Alvares pen amerıkalyq Djermell Charlo arasyndaǵy kezdesýdiń anderkardynda óner kórsetken Bek Nurmaǵanbet nıgerııalyq boksshy Abımbola Osýndaıromen judyryqtasyp, merziminen buryn jeńiske jetti. Alty raýndqa josparlanǵan aıqasta otandasymyz qarsylasyn úshinshi raýndta nokaýtpen tize búktirdi. Osylaısha, A.Osýndaıro karerasyndaǵy alǵashqy jeńilisine ushyrady. Al B.Nurmaǵanbet jeńisti jolyn jalǵap, jeńister sanyn 11-ge jetkizdi.
Sonymen qatar osy keshte judyryqtasqan taǵy bir otandasymyz Ábilhan Amanqul amerıkalyq Djoshon Djeımspen tóreshilerdiń sheshimi boıynsha teń tústi. Al boks keshiniń basty jekpe-jegindegi Saýl «Kanelo» Alvares pen Djermell Charlo arasyndaǵy aıqas alǵashqysynyń aıqyn basymdyǵymen aıaqtaldy. Sóıtip, «Kanelo» ózine tıesili beldikti kezekti ret sátti qorǵady.