Prezıdentke «Qazposhta» aksıonerlik qoǵamynyń bıylǵy 8 aıda atqarǵan jumystarynyń nátıjesi jóninde baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Atap aıtqanda, kompanııa shyǵyndardy ońtaılandyrý, elektrondy kommersııany jáne basqa da qarjylyq qyzmetterdi damytý esebinen sońǵy 5 jylda alǵash ret shyǵyny az, tabysty mekemege aınalyp otyr. «Qazposhtanyń» 8 aıdaǵy kirisi ótken jyldyń osy kezeńimen salystyrǵanda 44 paıyzǵa nemese 16,7 mıllıard teńgege artty.
Ásel Janasovanyń aıtýynsha, elimizdiń shalǵaı eldi mekenderinde «Qazposhtanyń» bólimsheler jelisin keńeıtý josparlanyp otyr. Bul poshta, qarjy, agenttik, áleýmettik jáne memlekettik qyzmetterdi qamtamasyz etýge múmkindik beredi.
Memleket basshysyna «Qazposhta» aksıonerlik qoǵamy elektrondy kommersııa naryǵynyń sýbektileri úshin biryńǵaı ekojúıe quratyny jóninde málimet berildi. Ol úshin kompanııa fýlfılment ortalyqtaryn damytý, otandyq jáne sheteldik tanymal marketpleıster úshin tapsyrystar berý pýnktterin ashý, qoımalar men poshtamat jelilerin keńeıtý jumystaryn júrgizip jatyr.
Sonymen qatar Prezıdentke Aqtóbe qalasynda, Túrkistan jáne Almaty oblystarynda logıstıkalyq hab salý jospary tanystyryldy. Mundaı logıstıkalyq hab osy aptada Astana qalasynda ashylmaq.
Kezdesý sońynda Qasym-Jomart Toqaev kompanııanyń qarjylyq jaǵdaıyn jaqsartý jumystaryn jalǵastyrýdy, aýyl turǵyndaryna kórsetiletin áleýmettik jáne memlekettik qyzmetter aıasyn ulǵaıtýdy tapsyrdy.