Búgin, 2 qazan kúni Almaty qalasynda Qazaqstan Jazýshylar odaǵynyń uıymdastyrýymen qazaq detektıviniń qalyptasý tarıhy men janrlyq erekshelikterine arnalǵan «Detektıv janrynyń darabozy» atty halyqaralyq ǵylymı-tájirıbelik konferensııa ótti, dep habarlaıdy Egemen.kz.
Konferensııa aıasynda «Qazaq detektıv janrynyń negizin qalaýshy», «Otan úshin ot keshý», «Jýrnalıst – qoǵamnyń aınasy, qulaǵy hám tili» atty taqyryptyq seksııalar uıymdastyryldy.
Konferensııada elimizdegi detektıv janrynyń damýy men ereksheligin talqylaý barysynda «qazaq detektıviniń atasy» atanǵan jazýshy Kemel Toqaevtyń ómiri men shyǵarmashylyǵyna qatysty derekter men tyń tujyrymdar talqylandy. Osydan 100 jyl buryn dúnıege kelgen jazýshynyń «Sarǵabanda bolǵan oqıǵa», «Kóshpendi úıdiń qonysy qaıda?», «Taýdaǵy jańǵyryq», «Kómeski iz», «Soldat qabiriniń basynda» atty týyndylary qazaq ádebıetindegi detektıv janrynyń alǵashqy qarlyǵashtary sanalady.
Shytyrman oqıǵaly povesteri qazaq prozasyna tyń úrdis ákelgen jazýshynyń shyǵarmalary álemniń birneshe tilderine aýdarylǵan. Sarapshy ǵalymdar Kemel Toqaev tek qazaq detektıv janrynyń ǵana emes, Ortalyq Azııa ádebıetinde osynaý biregeı janrdyń damýyna erekshe úles qosqan jazýshy ekenin atap ótti.
Konferensııa jumysyna Qazaqstan, О́zbekstan, Qyrǵyzstan, Reseı memleketteriniń shyǵarmashylyq zııaly qaýym ókilderi qatysty.
Atap aıtqanda, TÚRIKSOI uıymynyń bas hatshysy Sultan Raev, О́zbekstan Jazýshylar odaǵynyń múshesi Mınhojıddın Hodjımatov, Qyrǵyzstan Jazýshylar odaǵynyń Tóraǵasy Nurlan Qalybekov, Reseı ǵylymynyń eńbek sińirgen qaıratkeri, professor, detektıv janrynyń áıgili jazýshysy Dmıtrıı Shestakov, tanymal otandyq jazýshylar Dýlat Isabekov, Ahmetjan Ashırı, Qulbek Ergóbek, Qanseıit Ábdezuly, Nurlan Orazalın, Smaǵul Elýbaı, Jańǵara Dádebev jáne taǵy basqa qalamgerler, ǵylym jáne óner qaıratkerleri qatysty.
Konferensııa qorytyndysy boıynsha spıkerler men sarapshylardyń baıandamalary arnaıy jınaqqa basylyp shyǵady.