Májilis depýtaty Qazybek Isa Astana – Shymkent baǵytynda jolserik bolyp eńbek etetin Aqylzat Seıitjapardyń án shyrqaǵan beınesin áleýmettik jelige júktep, talantyna yqylasyn tanytty. «Qandaı keremet aıtady ándi. Mynaý jolserik ánshi qyzdyń orny vagon emes, sahna ǵoı» deıdi belgili qaıratker.
Aqylzatty bul kúnde ortasy jolserik dep qana emes, ánshi, ánshi bolǵanda da «opera ánshisi» dep tanıdy. Ol Jambyl oblysy, Qulan aýdany, Kógershin aýylynda dúnıege kelgen. Ánshilik atasy Seıitjapar men ákesi Esimhannan darypty. «Ákem jylqy baǵyp júrip dala tósin ánge bóleıtin. Bala kúnimnen janynan bir eli tastamaı aýyl ishindegi toı-tomalaqta birge án shyrqaıtynbyz» deıdi jolserik ónerpaz. Jetkinshek shaǵynan opera ánshileriniń týyndylaryn shyrqap ósken Aqylzattyń án salǵan daýsyn aýyldastary radıo qosylyp tur ma dep oılaıdy eken. Ánshilikti kásibı meńgerip, óner jolyn tańdaǵysy kelgen. Biraq mektepte oqyp júrgende Almaty qalasyna án baıqaýyna qatysýǵa qarajat qolbaılaý bolyp, ónerden baǵytyn aýlaq burýǵa sheshim qabyldapty. Talantty qyzdyń taǵdyry osylaı temirjol salasymen qabysyp kete barady.
Áleýmettik jeli juldyzyn jaqqan jolserik ánshini bul kúnde kópshilik kórgen jerde qolqalap án suraıdy. Tipti toıǵa shaqyratyndar da bar eken. Biraq ol ónerdi tabys kózine aınaldyrǵan emes. О́ner qashanda óziniń bıiginen alasarmaıdy. Talanttar túbinde tanylady. Ánshi qara orman tyńdaýshynyń kóńilin bul kúnde temirjoldyń ústinde terbetip keledi. Kásibı ıgergen mamandyǵy temirjol salasyna telýli talanttyń orny rasynda da sahna bolýǵa tıis edi. О́ıtkeni mundaı óner ekiniń birine qona bermeıdi. Jolyńyz túsip, siz otyrǵan vagonda Aqylzat Seıitjapar qyzmet atqarsa, mereıińizdiń tasyǵany. Dittegen jerińizge deıin ánimen terbetip jetkizedi.
Jolserik ánshi jaıyndaǵy beınejazbany tómendegi QR-kod arqyly kórýge bolady.