Kólikti erikti saqtandyrý arta tústi

Salystyrý úshin aıtar bol­saq, byltyr segment boıynsha jı­nalǵan syılyqaqy kólemi nebári 56,5 mlrd teńgeni qurady. KASKO syılyqaqylarynyń kólemi bes jylda 5,6 ese, al on jylda 11,9 ese ósken. Aıta keteıik, jalpy saq­tandyrý qyzmetin kórsetetin 16 saqtandyrý kompanııasynyń ishinde 14 kompanııa erikti múliktik saqtandyrýdy usynady. Onyń ishinde tek 10 saqtandyrý kompanııasy KASKO-ny onlaın tirkeýdi usynady, ıaǵnı is júzinde kez kelgen otandyq avtokólik júrgizýshisi úshin qoljetimdi ónim.

Osy ondyqtyń ishinde 2023 jyldyń qańtar-shilde aıla­ryn­da jınalǵan KASKO syılyq­aqy­larynyń kólemi boıynsha 9,8 mlrd teńge kólemimen «Eýrazııa» saqtandyrý kompanııasy kósh bastap tur. Jyldyq ósý qarqyny aıtarlyqtaı – 71 paıyz. Odan keıin «Halyq» (8 mlrd teńge) jáne Freedom Finance Insurance (6,8 mlrd teńge) saq­tan­dyrý kompanııa­lary keledi. Aı­tarlyqtaı kólem «NOMAD Inshýrans» saqtandyrý kom­pa­nııasynda da (5,5 mlrd teńge) bar.

Bir qyzyǵy, avtokólikti erikti múliktik saqtandyrý boıynsha saqtandyrý syılyqaqylarynyń barlyq túsiminen alynǵan syı­lyqaqy úlesi 2022 jylǵy qań­tar-shildede 5 paıyzdan 2023 jylǵy qańtar-shildede 9,3 pa­ıyzǵa deıin kóbeıgen. Sonymen qatar erikti múliktik saqtandyrý boıyn­sha syılyqaqylar esebinen avto­kólikti saqtandyrý boıynsha syı­lyqaqylardyń úlesi 12,1 pa­ıyz­dan 21 paıyzǵa deıin artypty.

Shyn máninde, búginde avto­kólikti erikti saqtandyrý segmenti jedel qarqynmen damyp, eldiń saqtandyrý naryǵyndaǵy sal­maǵyn aıtarlyqtaı arttyryp jatqany anyq. Sonymen birge bul fakt kólik quraldary ıe­le­riniń azamattyq-quqyqtyq ja­ýap­kershiligin mindetti saq­tandyrý jáne KASKO saqtandyrý boıynsha jınalǵan syılyqaqylar kó­le­mindegi alshaqtyqty kór­setedi.

Máselen, 2023 jylǵy qań­tar-shil­dede avtokólik ıe­leriniń aza­mattyq-quqyqtyq jaýap­ker­shiligin mindetti saq­tan­dyrý boıyn­sha syılyqa­qy­lardyń túsýi 68,7 mlrd teńgeni qurady, bul KASKO boıynsha syılyqaqy kóleminen nebári 7,4 paıyzǵa kóp. 2022 jyl­dyń qańtar-shilde aılarynda min­detti saqtandyrý salasyndaǵy syılyqaqylar kólemi KASKO boıynsha syılyqaqylar kóleminen birden 2,4 ese joǵary boldy. Jyl­dyq dınamıkada avtokólik ıeleriniń azamattyq-qu­qyqtyq ja­ýapkershiligin min­detti saqtandyrý boıynsha syı­lyqaqylar 11,1 paıyz ǵana ósti, bul KASKO segmentiniń ósý qar­qynynan aıtarlyqtaı tómen.

KASKO-ǵa degen qyzyǵýshy­lyqtyń jyldam artýy halyq­tyń avtokólikteri úshin erikti saq­­tandyrýdy tańdaýdaǵy habar­dar­­lyǵynyń ósip kele jatqanyn kórsetedi.