Akademık Qanysh Imantaıuly Sátbaevtyń esimin ıelengen kendi qala osy kúnderi ónerdiń de ordasyna aınalǵandaı. Qalada keıingi segiz jyl boıy respýblıkalyq aıtys ótkizilip kele jatqany da sonyń aıǵaǵy ispetti. Bıylǵy «Ken qazǵan qutty mekenim» atty sóz saıysy qalanyń 50 jyldyq mereıtoıyna arnaldy.
Aıtysqa elimizdiń ár túkpirinen 14 aıtysker kelip, baq synady. Olar kendi ólkeniń tarıhyn, búgingi jetistigi men kemshin tustaryn sózben órnektedi. Eki kún boıy zalda ıne shanshar oryn bolmaǵanynan-aq aıtystyń qandaı deńgeıde ótkenin baǵamdaý qıyn emes.
Sátbaev qalasynyń ákimi Shapaǵat Áýbákir ónerge jaqyn, ózi de óleń jazatyn azamat. Onyń aıtystyń ashylý, jabylý saltanattaryn bir aýyz óleńmen ádiptep jibergeni tipti keremet boldy.
Aıtys qorytyndysynda aqtóbelik Nurbol Jaýynbaev, pavlodarlyq Raýan Qaıdarov, astanalyq Nartaı Tileýqul, sátbaevtyq Abzal Maqash, jambyldyq Alına Aıdaraly, qyzyljarlyq Jarqyn Juparhan Alǵyshatqa ıe bolyp, árqaısysy 400 myń teńge syıaqymen marapattaldy.
Kendi ólkeniń maqtanyshtary, aqyndar Kákimbek Salyqov pen Shynbolat Dildebaev atyndaǵy arnaıy júldelerge Batys Qazaqstan oblysynyń aqyny Muradym Mırlanov pen Abaı oblysynyń Aısholpan Tileýtaıy ıe boldy. Olarǵa 500 myń teńgelik syıaqy tabystaldy.
III oryn ıelengen pavlodarlyq Aspanbek Shuǵataev pen shymkenttik Nurlan Esenqulovqa 700 myń teńgelik, II oryn ıegerleri – almatylyq Aıym Asylbekqyzy jáne qyzylordalyq Muhtar Nııazovqa 1 mln teńge, I oryn alǵan qaraǵandylyq Dıdar Qamıǵa 1,5 mln teńgelik syılyq berildi.
Bas júlde Qyzylorda oblysynyń aqyny Meıirbek Sultanhanǵa buıyrdy. Ol aıtystyń 2 mln teńge syıaqysyn jeńip aldy.
Aıtysty aqyn, fılologııa ǵylymdarynyń doktory, Parlament Májilisiniń depýtaty Amanjol Áltaı júrgizip otyrdy. Ol aıtys ónerin nasıhattaýǵa qosqan úlesi úshin «Sátbaev qalasyna – 50 jyl» merekelik medalimen marapattaldy.
Ulytaý oblysy,
Sátbaev qalasy