Qoǵamda múmkindigi shekteýli jandarǵa músirkeı qaraıtynymyz ras. Olardyń qandaı daǵdy men qarym-qabiletke ıe ekenin de bile bermeımiz. Biraq olardyń ómirge degen qulshynysy, áleýmettiń áleýetin kóterýge degen nıeti kópshilikti tánti etetini sózsiz.
Bul sózimizge Jambyl oblysynyń Turar Rysqulov aýdanyna qarasty Qulan aýylynyń týmasy Ersen Stanbek dálel bola alady. Ersen – talaı dodalarda baq synap, elimizdiń abyroıyn asqaqtatyp júrgen parapaýerlıftıng sportynyń sheberi. Ersenge sábı shaǵynda «dısplazııa» dıagnozy qoıylyp, kúni búginge deıin 18 ret operasııa jasalǵan.
– Densaýlyǵymdaǵy erekshelikpen bala kúnimde kóp alystym. Tipti, talaı aýrýhananyń esigin tozdyrdym. Alaıda esh moıymadym. 5-synyptan bastap ústel tennısimen, toǵyzqumalaq, júzý, qol kúresimen aınalysa bastadym, – deıdi Ersen Stanbek.
Demek, Ersen besaspap sportshy. Bulaı deýge tolyq negiz de bar. Sebebi ol – qol kúresinen Qazaqstannyń 5 dúrkin, álemniń jáne Azııanyń 2 dúrkin chempıony. Aýyr atletıkadan Dýbaı qalasynda ótken jastar arasyndaǵy parapaýerlıftıngten álem chempıonatynyń 3-oryn ıegeri. Ersenniń endigi maqsaty – Olımpıada chempıony bolý.
Úkimettiń 2014 jyldyń 13 naýryzyndaǵy qaýlysymen «Dene múmkindikteri shekteýli tulǵalarǵa arnalǵan sporttyq daıarlaý ortalyǵy» qurylǵany belgili. Munda da el úmitin aqtap júrgen qanshama sportshylar bar. 2013 jyly Bolgarııada Álem chempıony atanǵan jambyldyq Ǵabıt Esjanov, Azııa oıyndarynan bes dúrkin chempıony astanalyq Ánýar Ahmetov, Álem chempıony Sııazbek Dálıev jáne basqalar osy tizimde tur. Aty atalǵan tulǵalardyń barlyǵy búginde óz salasynda ozyqtar qatarynda. Tipti, 2014 jyly qazan aıynda Ońtústik Koreıanyń Inchhon qalasynda ótken Azııa paraoıyndarynda múmkindigi shekteýli sportshylarymyz 7 altyn medalmen rekordtyq kórsetkishke qol jetkizgen edi.
Qazir elimizde múmkindigi shekteýli jandarǵa arnalǵan kóp ortalyq jumys isteıdi. Solardyń biri – «IteachMe» qoǵamdyq qory. 2019 jyldan bastap jumysyn bastaǵan uıym búginge deıin múgedektigi bar, az qamtylǵan, jetim sanatyna jatatyn 500-den asa stýdentke bilim berip, olardyń jumysqa ornalasýyna yqpal etken. Jalpy, ortalyqta bilim alý múmkindigi 7 baǵyt boıynsha júrgiziledi. Olar: veb-master, UI/UX jáne motion dızaın, kopıraıtıng, mobılografııa, SMM+kopıraıtıng, BQ testileý jáne grafıkalyq dızaın mamandyqtary. Jáne barlyq oqý materıaldary qazaq jáne orys tilderinde, estý qabileti buzylǵan stýdentterge ym-ıshara tilinde ótkiziledi. Osy bilimniń bárin ortalyq tegin beredi.
«Qoǵamda múgedek adamdarǵa kózqaras durys qalyptaspaǵan. Sondyqtan, bizdiń maqsatymyz – «ITeachMe» jobasy sheńberinde taıaýdaǵy 10 jyl ishinde elimizde eńbekke qabiletti jastaǵy múgedektigi bar adamdardyń 90 paıyzyn baǵdarlamamen qamtyp, qoǵamda óz ornyn tabýyna kómektesý», deıdi uıym basshysy Zahıra Begalıeva.
Osy mekemeden bilim alǵan shákirttiń biri – Danıl Tyshenko. 2021 jyly «ITeacMe» uıymymen tanysyp, jobaǵa qatysýǵa ótinish qaldyrǵan ol 3 aı kóleminde onlaın dáris alyp, SMM jáne kopıraıtıng mamandyǵyn ıgergen. Nátıjesinde, belgili kompanııadan usynys túsip, SMM mamany bolyp jumysqa ornalasqan.
Darıǵa QURMANALY,
L.N.Gýmılev atyndaǵy Eýrazııa ulttyq ýnıversıtetiniń stýdenti