О́zine ǵana aıan qarańǵy túnek ishinde tirshilik keship júrgen adamnyń ishki dúnıesi syrtqy dúnıeni qalaı qabyldaıtynyn, jaryq sáýleni júrekpen tanýdyń erekshe jumbaǵyn «Men júregimmen kóremin» atty biregeı kórmeni tamashalaǵandar shyn túsindi. Qarapaıym adam aqparattyń 80 paıyzyn kórý arqyly qabyldaıdy. Al erekshe damyǵan sezimi men túısigine ǵana arqa súıegen zaǵıp jandardyń da óz shýaqty kúnderi, shuǵylaly álemi bar ekenine osy kórme kýá. Qarańǵylyq olardy syrtqy álemnen aıyryp, ózderiniń ishki álemin túısinýge múmkindik beredi. Olardy alańdatatyn artyq esh nárse joq. Muny ózińniń jan dúnıeńe saıahattaý dep ataýǵa da bolady.
Joba álemniń sulýlyǵyna erekshe tánti jandardyń máńgilik ónerge degen mahabbatyna arnalǵan. О́ner – túısiný men qabyldaýǵa tikeleı baılanysty tylsymǵa toly qupııa álem, sondyqtan bolar onyń jemisin qoǵamnyń az ǵana bóligi qabyldaıtyny qalypty jaıt. Mańdaıynda qos shyraǵy janyp turǵan jandardyń ózi túsine bermeıtin ónerdiń ómirge qushtar jandardyń tars jumýly janarynan týdy degenge sengiń kelmeıdi. Alaıda adamnyń álemdi kózben emes, júrekpen kóretinine olar osylaı ılandyryp otyr. Bul áleýmettik joba – eki aradaǵy parallel túısikterge aýysa otyryp, qorshaǵan álemdi tereńirek túsinýge jeteleıdi.
Júrek barda, dúnıeni seziný bar. Kenepke maıly boıaýmen salynǵan Ardan Ǵalymulynyń «Erkindik», Ilıa Smertınniń «Tabıǵat», Valerıı Kornılovtyń «Avtoportret», Innokentıı Kononovtyń «Shabyndyq», Mıchıl Moıseevtiń «Arman» atty kartınalarynda álemge degen óz kózqarasyn, ony ishteı qalaı kóretinin jáne sezinetinin eshkimge eliktemegen derbes qııalmen jetkize alǵan.
Kórmeni uıymdastyrý ıdeıasynyń avtory Marıka Andreevanyń jetekshiligimen sezimin, armanyn beıneleı otyryp salǵan kartınalarda ár sýretshiniń júrek terbeıtin taǵdyry men tarıhy qosa beınelengen. О́ziniń baǵyn beıneleý ónerinen izdep júrgen Ardan Ǵalymulyn qoldap, árdaıym janynan tabylatyn zaıyby Tomırıs: «Men álemdegi eń keremet jigitke kúıeýge shyqtym. Úılengenimizge úsh jyl boldy, biz baqyttymyz. Men odan meıirimdi, kishipeıildikti, adamnyń bárin súıetin izgilikti úırendim. Men – Ardannyń kózimin, ol – meniń júregim!», deıdi. Ardan zaǵıp jandardyń áleýmettený taqyrybymen aınalysatyn belsendi bloger de. Innokentıı Kononov bolsa, óz qolymen úı salypty. Al kóz aqaýymen dúnıege kelip, medısınanyń dármensizdiginen kórý qabileti birte-birte nasharlap, birjola qarańǵy túnek ishinde qalǵan Sahaıa Danılova «Kún uıasyna qonǵanda» degen shyǵarmasynda qoshqyl túske boıalyp, batyp bara jatqan kúnge qyzyqtap qarap turǵan otbasyny beıneleıdi. Sahaıa tarıh fakýltetin támamdaǵan, kitap oqıdy, júgirýmen, ústel tennısimen, ózin-ózi úzdiksiz jetildirýmen aınalysady. Turmys quryp, otbasyly bolýdy armandaıdy. Bul – talantty qyz-jigitter kórmegen nárseni kórý, sezinbegen nársege ǵashyq bolý, túsinbegen nárseni qabyldaý sııaqty adamnyń jan dúnıesindegi ózge shyndyqty janary jaınaǵandardyń aldyna jaıyp salady jáne syrttaǵy qaýymdastyqtyń qalypqa salynǵan shekteýli, úırenshikti túsinigine soqqy beredi.
Bul sýretshi rólindegi tájirıbe osy jobanyń árbir qatysýshysynyń eksperımentterge daıyn batyl tulǵa ekenin sıpattaıdy, óıtkeni olardyń eshqaısysy sýretshi mamandyǵy boıynsha arnaıy bilim almaǵan. Memlekettik óner mýzeıiniń mamandary olardyń álemine úńilýge múmkindik bergen biregeı sıpatty kórme úshin, ómirdi sheksiz súıetin júreginiń ashyqtyǵy men tazalyǵy úshin alǵys aıtty. Mundaı kórmeler on eki múshesi saý, aǵzasy aman árbir adamnyń jan dúnıesiniń tuńǵıyǵynan jańa baǵyttardy izdeýge sózsiz kómektesetin kerekti joba ekenine kóz jetkize túsedi.