Qytaıdyń Hanchjoý qalasynda ótip jatqan HIH jazǵy Azııa oıyndarynda grek-rım kúresinen 67 keli salmaqta kúresken jerlesimiz Meıirjan Shermaǵanbet fınalda súrinip, kúmis medaldi mise tutty, dep habarlaıdy Egemen.kz Týrızm jáne sport mınıstrligine qarasty Sportty damytý dıreksııasynyń baspasóz qyzmetine silteme jasap.
Meıirjan jazǵy Azııa oıyndarynyń altyn medali úshin beldesýde jastar arasynda álem chempıony degen ataǵy bar japon balýany Kasýakı Endoǵa ese jiberdi.
Byltyr Serbııada ótken álem chempıonatynda alǵan jaraqatynan qulan taza aıyqpaǵan Meıirjanǵa ashylyp kúresýge syrqaty qaıta syr berip, kedergi keltirdi. Tipti tórttaǵanda Endony eki ret ilip alǵan, biraq laqtyrýǵa kúshi jetpedi.
Japon balýany 3:4 esebimen utyp, Azııa oıyndarynyń «altynyn» oljalady.