Tazylar tartysy

Sońǵy jyldary halqy­myzben san ǵasyrdan beri bir­ge jasasyp kele jatqan jeti qazynanyń biri – ushqyr tazyǵa janashyrlyq jasala bastady. Keshegi keńes za­ma­nynda tuqymy tuzdaı qu­ryp kete jazdaǵan tazynyń taǵ­dyrdyń tálkeginen aman qalǵanyn úkideı úlpildetip, at basyndaı altynǵa balap, sanyn kóbeıtýge bet burylǵan. Sanyn ǵana emes, sapasyn da. Ilki zamanda qara jerde úsh-tórt qoıan qaqqan tazy ortasha ǵana júırik dep baǵalansa kerek. Ańǵa shyqqanda bes-alty qoıandy qyr asyrmaǵany shyn júırik dep tanylǵan.

Sapasyn anyqtaý da osyndaı synaqtan tursa kerek. Bulandyda ótken jarysqa Astana, Qaraǵandy tóńiregi­nen júzge jýyq tazynyń jı­nalýy eldiń yqylasyn, ót­ken­niń qaıta jańǵyrýyn, jo­ǵal­ǵannyń tabylǵandyǵyn ań­ǵartady. Irikteýden keıin 23 tazy jeke toptaldy. Jelmen jarysqan tazylardyń jaqtan ushqan jalǵyz jebedeı zýlaǵan ushqyrlyǵyn kórýdiń ózi bir qyzyq. Qanyń qyzyp, delebeń qozady. Bul kúni jınalǵan jurt­tyń aýzynda Kerbez at­ty tazy júrdi. Itim-aq eken. Bi­rinshi oryn alǵan Kerbez­diń ıesi jańarqalyq Aızat Toqa­baev, óńsheń júırikti shań qaptyrdy. Quddy juldyzdaı aǵady. Ekinshi orynǵa Arlan atty tazy ıe boldy. Iesi qara­ǵandylyq Jumajan Jan­se­rik. Úshinshi orynǵa astana­lyq Baqbolat Ershinniń Tuı­ǵyny jaıǵasty. Sóz arasynda Ar­lannyń kópshiliktiń kóz­aıy­myna aınalǵan Ker­bezdiń kú­shigi ekendigin aıta ketsek ar­tyq­tyǵy bolmas.

Jarys bary­syn­da jalǵyz tazynyń ǵana emes, ony bap­taǵan jigit­ter­diń ulttyq kıim úlgisi de sarap­qa salyndy. Bul oraıda jańar­qalyq jigitterdiń mereıi ústem boldy. Arnaıy syı­lyq Eldos Kárimqojaǵa bu­ıyrdy. Aıtpaqshy, jarys­ty Bulandynyń Jaınarbek Zańdybaı bastaǵan ult qazy­na­syn ulyqtaǵan jigitter uıym­­­dastyrǵanyn aıta ketken jón. Jeńimpazdarǵa baǵaly syılyqtar tabys etildi.

Aqmola oblysy,

Bulandy aýdany