Qalam ustaǵan qaýym men qalyń oqyrmandy qýantqan jańalyq belgili aqyn-jazýshy, dramatýrg, qalamy qarymdy jýrnalıst Tólegen Qajybaıdyń jeti tomdyǵynyń jaryq kórýi bolyp otyr.
Oqyrmanǵa olja salǵan qalamgerdiń artynda qalǵan eńbegi saralanyp, jeti tomdyq jınaq etip shyǵarǵannan keıin oblys ortalyǵyndaǵy «Bolashaq» saraıynda tusaýkeseri ótkizildi. Alǵashqy tomynda óleńderi men balladalary, ekinshi tomynda jyr-dastandary men poemalary toptastyrylypty. Áńgimeleri men hıkaıattary, povesteri bir bólek. Romandary jeke berilgen. Aýdarmalary men dramalary da jiktelgen. Pýblısıstıkalyq oı-tolǵamdary óz aldyna bir bólek. Jetinshi tomy «Tolǵaýy toqsan Tólegen» atty ortaq taqyryppen qurastyrylǵan. Onda syr-suhbattar, estelik maqalalar bar.
Tusaýkeserdi oblys ákiminiń orynbasary Altynaı Ámirenova ashyp, qalamgerdiń máıegi mol shyǵarmashylyǵyna toqtaldy. Azamattyq bitim-bolmysy da qamtyldy. Sóz dámin biletin kópshilik qalamgerdiń uly Aıan Qajybaı sóılegende siltideı tyndy. Tókeńniń talantty perzenti búginde aıtýly ádebıet zertteýshisi, ǵalym. Nárli de árli sóz ákege degen perzenttik qurmetti, sarytap bolǵan saǵynyshty ańǵartyp turdy. Sóz sońyn túıindeı kele, janaryna jas úıirilýi kópshiliktiń júregin eljiretip jiberdi.
Kókshede buryn-sońdy mundaı kóptomdyq dúnıe shyǵa qoıǵan joq. Tuńǵysh shara tushymdy ótti. Halyq sóz syılaı biledi eken. Sıqyrly sózdi qalam ushymen jalpaq jurttyń rýhanı murasyna aınaldyrǵan jampozdyń da arýaǵyn syılaýy talantqa degen alǵaýsyz qurmet.
KО́KShETAÝ