Memlekettiń kirister komıteti kóleńkeli ekonomıkaǵa qarsy kúres sheńberinde «jalǵan» shot-faktýralardy jazyp berý táýekeliniń eń joǵary yqtımaldylyǵy bar kompanııalarǵa qatysty bıometrııalyq sáıkestendirýdi paıdalanbaq. Taýarlardy naqty satpaı nemese jumystardy oryndamaı qujattardy resimdeý adal bıznes úshin qarjylyq operasııalardyń qaýipsizdigi men senimdiligine qaýip tóndiredi.
Salyq organdary tek 2021 jyldan bastap táýekelderdi basqarý júıesi negizinde kompanııalardy tirkeýge jáne shot-faktýralardy jazyp berýge qatysy joq 2,6 myńnan asa quryltaıshy men basshy anyqtady. Osy jáne basqa da negizder boıynsha sot organdary tirkeýdi jáne qaıta tirkeýdi jaramsyz dep taný týraly 3,9 myńǵa jýyq sheshim shyǵardy. Shot-faktýralar boıynsha jalǵan aınalym somasy 1 trln teńgeden asty.
«Taýarlardy naqty satpaı nemese jumystardy oryndamaı qarjylyq qujattardy resimdeý faktileri anyqtalyp jatyr. Bul rette ákimshilendirý barysynda mundaı «formaldi» basshylar olarǵa kompanııalardyń tirkelgeni jáne olardyń atynan shot-faktýralar jazyp berilgeni týraly alǵash ret estip otyrǵany belgili boldy», dep habarlady Memlekettik kirister komıteti.
Sıfrlyq joba bıometrııalyq sáıkestendirýdi tek erekshe jaǵdaılarda jáne joǵary táýekel dárejesinde qoldanýdy kózdeıdi. Elektrondyq shot-faktýralardy jazyp beretin kompanııalardyń shamamen 1 paıyzyn qamtıdy. Digital-ID sharasy bıznesti shektemeıdi: ony kúnine bir ret kez kelgen yńǵaıly ýaqytta ótý kerek.
Salyq organdary bıometrııalyq derekterdi jınamaıdy, tekserý elektrondyq úkimet portalynda paıdalanylatyn servısterde júzege asyrylady. Elimizde memlekettik qyzmetterdi alý kezinde osyǵan uqsas tehnologııany qoldanǵanyna eki jyldan asa ýaqyt bolǵanyn atap ótý qajet.