Senattyń Qarjy jáne bıýdjet komıtetiniń depýtattary Almaty qalasyndaǵy «Qazaqstan qor bırjasy» AQ-da boldy, dep habarlaıdy Egemen.kz joǵarǵy Palatanyń baspasóz qyzmetine silteme jasap.
«Memleket basshysy Qasym-Jomart Toqaevtyń bıylǵy jylǵy 1 qyrkúıektegi halyqqa Joldaýyn iske asyrý aıasynda parlamentshiler elimizdiń qor naryǵynyń qyzmetine baılanysty máselelerdi zerdeleýdi odan ári jalǵastyrdy. Prezıdent ishki naryqtyń aýqymy men tartymdylyǵyn arttyrý maqsatynda KASE jáne AHQO áleýetin biryńǵaı basqarýǵa biriktirý máselesin pysyqtaý qajet ekenin atap ótti», delingen habarlamada. «Ár túrli saraptamalyq jáne tehnıkalyq pikirler týyndap otyr. Bul máseleni biz búgin KASE bazasynda Qarjy naryǵyn retteý jáne damytý agenttiginiń, Ulttyq banktiń ókilderimen jáne baǵaly qaǵazdar naryǵynyń kásibı qatysýshylarymen birge talqylap otyrmyz. Qazir halyqaralyq tájirıbeni zerdeleý satysyndamyz. Bırjalar - onyń barlyq prosesterin uzaq zertteýdi qajet etetin kúrdeli organızm», dedi senator Bekbol Orynbasarov. Senat depýtattary qor bırjalarynyń basshylyǵymen tize qosyp osy salany zańnamalyq deńgeıde odan ári jetildirýge yqpal etýge daıyn ekenin aıtty.