Astanada Nobel Fest ǵylymı festıvali aıasynda Oqý-aǵartý mınıstrliginiń qoldaýymen Qazaqstan tarıhynda alǵash ret uıymdastyrylǵan – Pedagogterdiń ashyq ulttyq sammıti ótip, oǵan álemniń eń úzdik ustazdary qatysty, dep habarlaıdy Egemen.kz.
Vedomstvonyń málimetinshe, pedagogter sammıti – muǵalimder, ata-analar jáne mektep basshylyǵy úshin kásibı bilim berý platformasyn qurýǵa baǵyttalǵan bastama.
Biregeı sharanyń ashylýynda Oqý-aǵartý birinshi vıse-mınıstri Natalıa Jumadildaeva sóz sóılep: «Bul sharada túrli mádenıetter, tilder men pedagogıkalyq tásilder toǵystyryldy. Eń bastysy, bul sharada shákirtine tolyqqandy bilim berý úshin óz biliktiligin únemi arttyryp, jetildirip otyratyn pedagogti birinshi orynǵa qoıyp otyrmyz», dedi.
Aıta ketsek, Nobel Fest - halyqaralyq EdTech platformasy. Festıvaldiń basty maqsaty – otandastarymyzdy bilimge, ǵylymǵa jáne ınnovasııaǵa baýlý.