Qyzylordada Qazaqstannyń eńbek sińirgen qaıratkeri, aqyn Shómishbaı Sarıevti eske alý keshi ótti. Aıdyndy Aral jaǵalaýynda ómirge kelgen aqyn rýhyna arnalǵan is-shara Á.Tájibaev atyndaǵy ámbebap ǵylymı kitaphanadaǵy «Kúnge qaraı júremin...» atty poezııa keshinen bastaý aldy. Kitaphanada «Teńiz týdyrǵan talant» atty kitap kórmesi uıymdastyrylyp, jastar óleń oqydy. Ánshiler aqyn óleńine jazylǵan ánderdi oryndady.
Shómishbaı Sarıev – ádebıetke jetpisinshi jyldary kelgen talantty lektiń ókili. Sol jyldary «Baldáýren» atty tyrnaqaldy jınaǵy jaryq kórgen aqyn – on bes shaqty kitaptyń avtory. Qazaqtyń qabyrǵaly qalamgeri Ǵafý Qaıyrbekov «Shómishbaı – qos qanatty aqyn. Birinshisi, lırıkalyq jyrlary bolsa, ekinshisi – án-óleńderi. Poezııanyń eki salasy aqynnyń qos qanatyna aınalǵan» dep baǵalaǵan aqynnyń 300-den astam óleńi áýezdi ánge aınalǵan.
Poezııa keshinde jazýshy Saılaýbaı Jubatyrov, aqyn Qatıra Jálenova, Maqsat Daýylbaı estelik aıtyp, keshti uıymdastyrýshylarǵa alǵysyn jetkizdi.
«Jalpy, qazaq rýhanııatynyń tabaldyryǵyn attaǵan kez kelgen tolqyn, Muhtar Áýezov aıtpaqshy, «jyl kelgendeı jańalyq sezindirgisi» keletini anyq. Bul tarapta jetpisinshi jyldary ádebıetke kelgen bizdiń jolymyz boldy. Ádebıetimizdiń abyzy Muzafar aǵa Álimbaev Muqańnyń osy biz aýyz sózin qaıtalaı aıtyp, bizdi aıalap otyratyn edi. Búgingi keshte sonyń bári eske túsip otyr. Týǵan jerin óshpes ánge ózek etken Shókeń – armansyz aqyn. Búgingi keshke jary Jumakúl Sarıeva balalaryn da ertip kelgen eken. Tamyryn týǵan jerden úzbegen aqynnyń ózi de, murasy da umytylmaıdy», dedi Saılaýbaı Jubatyrov.
Aqyn Qatıra Jálenova ádebıette qatar júrgen qalamger týraly esteliginde Shómishbaı Sarıevtiń «Tamasha» oıyn-saýyq otaýynyń kórermenge jol tartýy úshin jasaǵan tolymdy eńbegine toqtaldy. Eske alý keshine jınalǵandar oblystyq tarıhı-ólketaný mýzeıindegi aqynnan qalǵan estelik murany tamashalady.
Osy kúni keshkilik N.Bekejanov atyndaǵy oblystyq drama teatrǵa jıylǵan jurt Shómishbaı Sarıev shyǵarmashylyǵyna arnalǵan «Teńizdeı tebirendim, terbediń…» atty keshtiń kórermeni boldy. Oblys ákimi Nurlybek Nálibaev kesh qonaqtaryn quttyqtap, Shómishbaı Sarıevtiń el mádenıetine qosqan úlesin atap ótti.
«Syrda týyp, aty alty Alashqa tanylǵan daryn ıeleriniń qatarynda aqyn Shómishbaı Sarıevtiń esimi erekshe. Syr jurty óz perzentterin árdaıym qurmet tutyp, eńbegin eshqashan umytpaıdy. Daryndy tulǵanyń ónegeli ómirin urpaqqa nasıhattap, qazynasyn altyn qorda saqtaıdy. Qazaq ónerin órge júzdirgen Syr perzenti Shómishbaı aǵamyzdyń rýhy shat, urpaǵy aman bolsyn», dedi aımaq basshysy.
Nurlybek Mashbekuly aqynnyń jubaıy Jumakúl Sarıevaǵa qurmet tanytyp, búgingi keshke oraı Memleket basshysynyń arnaıy quttyqtaý hatyn tabystady. Kóp aldynda elge rızalyǵyn bildirgen Jumakúl Sarıeva eki jyl buryn 75 jasyna eki aı qalǵanda ómirden ozǵan aqyn rýhyna ǵylymı-tanymdyq konferensııa arnaǵan araldyqtardyń qurmeti kóńilin tolqytqanyn atap ótti. Odan keıin de Syr elinde aqynnyń esimin qurmettep, eńbegi men shyǵarmashylyǵyn dáripteý úzilgen emes. Oblystyq tarıhı-ólketaný mýzeıiniń óner zalynda burysh ashyldy.
Keshte Qazaqstannyń halyq ártisteri Roza Rymbaeva, Maqpal Júnisova, ánshi Jeńis Ysqaqova, Súleımen Ibragımov, Jubanysh Jeksenuly aqyn óleńderine jazylǵan ánderdi oryndady.
QYZYLORDA