Biraz ýaqyt buryn Memleket basshysy Qasym-Jomart Toqaev elimizde sheteldik joǵary oqý oryndarynyń fılıalyn ashý týraly tapsyrma bergeni belgili. Prezıdent bul qadam elimizde ǵylymı ekojúıeni ulttyq bilim jáne ǵylym júıesine engizýge múmkindik beretinin atap ótken edi.
Memleket basshysynyń tapsyrmasyn júzege asyrýdy qolǵa alǵan M.H.Dýlatı atyndaǵy Taraz óńirlik ýnıversıteti, hımııa óndirisiniń lokomotıvi sanalatyn «Qazfosfat» JShS jáne D.Mendeleev atyndaǵy Reseı hımııa-tehnologııa ýnıversıteti birneshe aı buryn úshjaqty kelisimge qol qoıyp, TMD elderi arasynda alǵash ret hımııa ónerkásibi salasyndaǵy jelilik kampýstyń tusaýkeserin uıymdastyrdy.
Bastaǵan isti aıaǵyna deıin jetkizýdi oılastyrǵan óńirlik ýnıversıtet ujymy «Mendeleev synyby» jobasynyń saltanatty ashylý rásimin joǵary deńgeıde ótkizdi. Is-sharaǵa D.Mendeleev atyndaǵy ýnıversıtettiń professorlary, «Qazfosfat» qyzmetkerleri, mektepterdegi hımııa pániniń muǵalimderi, ata-analar jáne M.H.Dýlatı atyndaǵy ýnıversıtettiń ujymy, stýdentter qatysty.
Biregeı jobanyń tusaýkeser rásimine qatysqan oblys ákiminiń birinshi orynbasary Nurjan Kalenderov hımııa óndirisine qajetti bilikti mamandardy daıarlaý maqsatynda qolǵa alynǵan birlesken istiń mańyzy zor ekenin atap ótti.
– Osy jyldyń basynda Prezıdent Qasym-Jomart Toqaev 2025 jylǵa qaraı elimizde bedeldi sheteldik ýnıversıtetterdiń keminde bes fılıalyn ashýdy tapsyrǵan bolatyn. Memleket basshysy jańa ekonomıkany qurý úshin joǵary oqý oryndarynyń básekege qabilettiligin arttyrý mańyzdy ekenin aıtty. Alǵashqylardyń biri bolyp M.H.Dýlatı atyndaǵy Taraz óńirlik ýnıversıteti Prezıdenttiń tapsyrmasyn oryndap, strategııalyq seriktester sanalatyn D.Mendeleev atyndaǵy Reseı hımııa-tehnologııa ýnıversıteti jáne «Qazfosfat» JShS-men birlesip, hımııa ónerkásibine mamandar daıarlaý jónindegi kelisimge qol qoıdy. Bul, árıne, quptarlyq qadam, – dedi Nurjan Kalenderov.
О́ńirlik ýnıversıtettiń rektory Muhtar Baıjumanovtyń aıtýynsha, suranysqa ıe jańa mamandardy daıarlaý maqsatynda iske asatyn joba jastardyń ıgiligi úshin qolǵa alynǵan.
– Oqytý úrdisi «2+1+1» formaty boıynsha júzege asyrylady. Qyrkúıek aıynan bastap 3-kýrsta oqıtyn 7 stýdentimiz Máskeý qalasynda hımııalyq ınjenerııa jáne úderister boıynsha bilim alýdy bastady. D.Mendeleev atyndaǵy Reseı hımııa-tehnologııa ýnıversıteti halyqaralyq deńgeıde moıyndalǵan joǵary oqý orny ekenin aıta ketken lázim. TMD elderi men shetelde hımııa jáne hımııa tehnologııasy salasy boıynsha jetekshi ǵylymı ortalyq sanalatyn ujymmen birlesken jobanyń bereri kóp, – deıdi Muhtar Baıjumanov.
Úshjaqty kelisim negizinde júzege asatyn jobanyń alǵashqy kezeńinde 43 oqýshy qabyldanyp otyr. Is-sharaǵa qatysqan ata-analardyń aıtýynsha, qat mamandyqqa ańsary aýǵan balalardyń óz isiniń sheberi bolyp shyǵýyna múmkindik mol.
Jańa jobanyń tanystyrylymyna arnaıy qatysqan «Qazfosfat» JShS «Mıneraldy tyńaıtqyshtar» zaýytynyń dırektory Iýn Albert «Mendeleev synybyn» qurýdyń óńirlik deńgeıde mańyzy zor ekenin atap ótti. Sondaı-aq ol oqý ozaty bolǵan túlekter turaqty jumyspen, joǵary jalaqymen qamtamasyz etiletinin tilge tıek etti.
Is-shara barysynda sóz alǵan D.Mendeleev atyndaǵy ýnıversıtettiń bilim berý baǵdarlamalaryn damytý jáne halyqaralyq qyzmet jónindegi prorektorynyń orynbasary Georgıı Shahgıldıan kópshilikke «Mendeleev synyby» jobasy týraly aıtyp berdi. Keıinnen osy jobanyń alǵashqy qatysýshylary saltanatty túrde ant qabyldady.
TARAZ