Sambo
ShAŃǴARAEVTYŃ ShÁKIRTTERI — TAShKENTTE
Senbi kúni Tashkentte sambodan úsh jas mólsheri boıynsha Azııa chempıonaty bastaldy. Oǵan sary qurlyqtyń 21 eliniń samboshylary qatysýda.
Qazaqstan quramasyn chempıonatqa bas bapker Qaırat Shańǵaraev bastap bardy. Bul – onyń ulttyq quramany 1992 jyldan beri jattyqtyryp kelgen Kereı Qoıshybekti almastyrǵannan keıingi alǵashqy sheteldik básekesi. Ázirshe jańa bapkerdiń shákirtteri qalaı óner kórsetetinin aıtý qıyn. Buryndary K.Qoıshybek ulttyq quramanyń tizginin ustap turǵanda otandastarymyz 9 salmaq dárejesinde kem degende 4 altyn júlde jeńip alatyn edi. Endi munyń bárin apta sońyna deıin jalǵasatyn Azııa chempıonaty kórsetetin bolady.
Boks
EKINShI TÝRNIRDIŃ EREKShELIGI
28 maýsym men 2 shilde aralyǵynda Astanada bokstan eresekter arasynda Qazaqstan Respýblıkasy Prezıdentiniń kýbogy jolyndaǵy II halyqaralyq týrnır ótedi. AIBA erejesi boıynsha bıyl ekinshi ret jalaýyn kóteretin týrnırge birneshe eldiń bylǵary qolǵap sheberleri qatysyp, 11 salmaq dárejesinde kúsh synasady.
Boks federasııasynyń málimetterine qaraǵanda, bıylǵy básekeniń ótken jyldardaǵydan bir ereksheligi, munda árbir jekpe-jek 3 mınótten 3 raýnd boıynsha ótedi. Atalmysh týrnırdiń ádettegideı 4 raýnd emes, 3 raýnd boıynsha ótkiziletinin boks mamandary AIBA-nyń erejelerine sáıkes, sporttyń osy túrin damytýǵa jasalyp jatqan jaǵdaıdyń bir túrimen baılanystyrýda.
Voleıbol
QOS KOMANDA — QURLYQTYQ ChEMPIONATTA
Jaqynda voleıboldan “Almaty” komandasy senbi kúni Qytaıda klýbtar arasynda bastalatyn Azııa chempıonatyna attanyp ketti. Bul básekede “A” tobyna túsken otandastarymyz Japonııa, Vetnam, Indonezııa jáne alań ıelerimen kúsh synasady.
Chempıonattyń alǵashqy kezdesýleri búgin ótedi. Erler arasyndaǵy oıyndar aıaqtalǵan soń, jarysty odan ári boıjetkender jalǵastyrady. Olar araǵa eki apta salyp, Indonezııada jalaýyn kóteretin qurlyqtyq chempıonatqa qatysady. Bul synda elimizdiń namysyn bıylǵy Qazaqstan chempıony “Jetisý” komandasy qorǵaıtyn bolady.
Qazaqstan voleıbol qaýymdastyǵynyń bas hatshysy Ermek Syrlybaevtyń aıtýynsha, erler jarysy 13 maýsymǵa deıin sozylsa, áıelder básekesi 26 maýsym men 4 shilde aralyǵynda ótedi. Byltyr “Almaty” men “Jetisý” komandalary atalmysh chempıonatqa qatysyp, júldesiz qaıtqan bolatyn. Endi bıylǵy synda otandastarymyz ótken jyly Birikken Arab Ámirlikteri men Taılandtan ketken eseni qaıtarýǵa bar kúshin salady. Osy jolǵy chempıonattyń áıelder komandasy úshin taǵy bir mańyzdy jeri, eger “Jetisý” bıylǵy básekede úzdik úshtiktiń qataryna kiretin bolsa, kelesi jyly klýbtar arasynda ótetin álem chempıonatyna qatysýǵa joldama alady.
Dastan KENJALIN.