Bul týraly Aqmola oblysy ákimdiginiń resmı saıtynan málim boldy, dep habarlaıdy Egemen.kz.
Bıylǵy Joldaýynda Memleket basshysy Qazaqstanda atom elektr stansııalaryn salý máselesi boıynsha jalpyulttyq referendým ótkizýge bastamashy bolǵany málim. Sonymen qatar Prezıdent Joldaýda referendým ótkizý merzimderi keıinirek belgilenetinin ataǵan. Referendým ótkizý tártibi 1995 jylǵy 2 qarashadaǵy «Respýblıkalyq referendým týraly» Qazaqstan Respýblıkasynyń Konstıtýsııalyq zańymen reglamenttelgen.
Qazaqstanda AES salý máselesin talqylaý maqsatynda referendým ótkizilgenge deıin Kókshetaý qalasynyń ákimdigi jarııa talqylaýlar ótkizýdi josparlap otyr.
Atom salasynyń salalyq sarapshylary qatysatyn jarııa talqylaýlardy ótkizý barysynda azamattar ózderin qyzyqtyratyn tehnologııalardyń qaýipsizdigi boıynsha da, AES qurylysynyń áleýmettik-ekonomıkalyq aspektileri boıynsha da kez kelgen suraqtaryn qoıa alady.
Jarııa talqylaý Kókshetaý qalasy «Dostar» mekenjaıynda 16 qazanda saǵat 10:00-de ótedi.