Barsakelmes tabıǵı qoryǵy IýNESKO-nyń álemdik jáne mádenı murasy mártebesin ıelendi. Tabıǵı qoryqtyń «Barsakelmes», «Qasqaqulan» jáne «Delta» ýchaskelerinde bolyp, olardyń erekshelikterimen tanysqan Halyqaralyq tabıǵat qorǵaý odaǵy sarapshylarynyń saparynan keıin bıosferalyq rezervatty dúnıejúzilik mura tizimine engizý týraly sheshim qabyldanypty.
Qoryq dırektory Hamıt Qanıevtiń aıtýynsha, Saýd Arabııasynyń astanasynda ótken IýNESKO-nyń Búkilálemdik mura komıtetiniń 45-keńeıtilgen sessııasynda berilgen bul mártebe qaıtalanbas tabıǵı keshenderdiń birtutastyǵy men qaýipsizdigin saqtaýǵa qosymsha kepil bolady.
Sarapshy ǵalymdar aýa temperatýrasynyń asa joǵary jáne tómen aıyrmashylyqtary baıqalatyn shóldi aýmaqtaǵy ekojúıelerdiń evolıýsııasy men kúrdeli klımattyq jaǵdaılarǵa beıimdelýine basa nazar aýdarǵan. Qoryq aýmaǵyndaǵy kepken teńiz ultanyn jáne oǵan jaqyn ornalasqan jerlerdi kógaldandyrýdyń qamy men qulan, qaraquıryq, aqbóken sııaqty sırek kezdesetin janýarlar túrlerin jańa jaǵdaıǵa beıimdeý baǵytyndaǵy bastamalar da eskerýsiz qalmaǵan.
Memlekettik tabıǵı qoryq osydan 7 jyl buryn IýNESKO-nyń bıosferalyq rezervattarynyń álemdik júıesine engen edi. Al 2020 jyly «Elim-aı» syılyǵynyń «Eń úzdik qoryq» atalymy tabystaldy.
Qyzylorda