Qazan aıynyń 6-sy kúni «Býrabaı kýrorty – Jamantuz» baǵytyndaǵy temirjol boıynan jas jigittiń máıiti tabyldy. Ulynan aıyrylyp, ańyraǵan ana Memleket basshysy Qasym-Jomart Toqaev pen Ishki ister mınıstrine janaıqaıyn jetkizip, ádildik bolsa eken deıdi.
Prezıdent osy máselege oraı Ishki ister mınıstrligine stýdenttiń ólimine qatysty barlyq jaıdy muqııat tekserip, mán-jaıdy jan-jaqty tekserýdi tapsyrdy. «Kináliler zań talaptaryna saı jaýapqa tartylýy kerek. Prezıdent bul máseleni erekshe baqylaýǵa aldy», dep habarlady Aqordanyń Telegram kanalyndaǵy resmı paraqshasy. Ishki ister mınıstrliginiń ortalyq apparaty men oblystyq polısııa departamenti qyzmetkerleriniń qatysýymen arnaıy jedel-tergeý toby qurylyp, oqıǵanyń mán-jaıyn anyqtap jatyr. Qazir tergeý áreketterin júrgizý de qolǵa alyndy. Barlyǵy belgili bolǵannan keıin quqyqtyq baǵa beriletin bolady. Qaza bolǵan 19 jastaǵy jigittiń joǵary tehnıkalyq kolledjiniń 4-kýrsynyń bilim alýshysy ekendigi birden belgili bolǵan. Jelilik polısııa bólimshesi Qylmystyq kodekstiń 344-babynyń 2-tarmaǵy boıynsha qylmystyq is qozǵady. Qaza tapqan jigittiń anasy bul qazanyń abaısyzda bolǵan oqıǵa ekendigine senbeıdi. Qazir túrli joramaldar da aıtylyp jatyr. Baýyr eti balasynyń qazasyna jany kúıgen anasy bolsa Shýche qalasynda uıymdasqan qylmystyq top bar dep esepteıdi. Aıtýyna qaraǵanda, ózge balalarmen de birneshe márte kıkiljiń bolsa kerek. Aqsha bopsalaý men psıhologııalyq qysym bolǵan. Uıymdasqan qylmystyq top buryn da stýdentten birneshe márte aqsha talap etken eken.
Qazan aıynyń besinen altysyna qaraǵan túni balasy úıden shyǵyp ketse kerek. Arada nebári jarty saǵat ótkennen keıin óli denesi temirjol boıynan tabylǵan. Qaıǵydan qara jamylǵan anasy bolsa balam ómirge qushtar, aldyna qoıǵan úlken maqsaty, armany bar edi dep kúızelip otyr.
Qazir bul oqıǵaǵa qatysty Qylmystyq kodekstiń 105-baby boıynsha qosymsha qylmystyq is qozǵaldy. Týystarynyń aryz-shaǵymyna oraı joǵaryda aıtylǵan másele egjeı-tegjeı zerttelip jatyr.
Aqmola oblysy