Eldegi baılanysqa jaýapty «Qazposhta» qyzmetiniń qurylǵanyna bıyl 30 jyl tolypty. Ári 9 qazan – Poshta kúni. Osynaý mereıli dataǵa oraı Shyǵys Qazaqstandaǵy «Qazposhta» AQ fılıalynda BAQ ókilderiniń qatysýymen dóńgelek ústel ótti. Munda birqatar máseleler talqylanyp, utymdy usynystar aıtyldy.
Áýeli sóz alǵan «Qazposhta» fılıalynyń dırektory Gúljan Rahymbaeva áriptesterin tól merekelerimen quttyqtap, buqaralyq aqparat quraldary ókilderimen yntymaqtasa jumys isteýge shaqyrdy.
– Qurmetti áriptester! Sizderdi tól merekelerińizben shyn júrekten quttyqtaımyn! Sharaǵa jınalǵan BAQ ókilderimen qanattasa jumys isteýge árqashan daıynbyz. Maqsat-múddemiz bir. Jýyqta ǵana Prezıdent Qasym-Jomart Toqaev «Qazposhta» AQ tóraǵasy Ásel Janasovany qabyldap, aýyl turǵyndaryna kórsetiletin áleýmettik, memlekettik qyzmetterdiń aıasyn ulǵaıtýdy tapsyrǵan. Sondyqtan sizderdi qoldaýǵa, usynystaryńyzdy qabyldaýǵa árqashan ázirmiz, – dedi fılıal basshysy Gúljan Oralbekqyzy.
Iá, gazet-jýrnalǵa jazylym neǵurlym kóp bolsa, poshta qyzmetiniń de áleýeti arta túsedi. О́kinishtisi, ınternet jelisi men uıaly baılanys qyzmeti damyǵan saıyn baspasózge jazylý tómendep barady. Al «Qazposhta» qyzmetine memleketten bólinetin sýbsıdııa óte az kórinedi. Poshta basshylarynyń sózinshe, úsh gazet úshin 51 teńgeniń aınalasynda ǵana eken.
Aıta keterligi, Shyǵys Qazaqstan men Abaı óńiri eki oblys bolyp bólingenimen, «Qazposhta» qyzmetiniń baǵyt-baǵdary baıaǵydaı. Jańa jyldan keıin ǵana ózgerýi múmkin. Jıynda baspasózge jazylý máselesinen bólek, oqyrmandarǵa gazet-jýrnaldyń ýaqytyly jetpeýi de sóz boldy. Bul óte ózekti másele edi. Bilemiz, baspasóz naýqany aıaqtala salysymen
aýyl-aýyldan oqyrmandar telefon soǵyp, gazetiniń keshigip jatqanyn aıtyp, aryzdanady. Ondaı jaǵdaıda «Qazposhta basshylyǵy naqty faktimen jumys isteıtinderin jetkizdi. Demek, oqyrmannyń mekenjaıyn naqtylap, oblystaǵy fılıal basshylyǵyna usynýymyz kerek. Eger gazet-jýrnal poshtashynyń kinásinen jetpeı jatsa, belgili mólsherde aıyppul arqalaıdy eken. Alaıda poshtashy úshin de qolaısyz jaǵdaılar bar. Máselen, gazet-jýrnal, hat-habar taratyp júrgen poshta qyzmetkerine ıesiz ıtterdiń shabýyly jıi bolyp turady eken. Jylyna joq degende eki-úsh qyzmetkerdi ıt qaýyp alady desedi. Sondaı-aq poshta jáshiginiń joqtyǵy da qolaısyzdyq jasaıdy. Ásirese О́skemende boı kótergen jańa turǵyn úılerde poshta jáshigi oılastyrylmaǵan eken. Qala degendeı, podezderge kirý de úlken problema kórinedi.
Jıynda jýrnalıster gazetke jazylý naýqanynda birlesip, tyń jobalar uıymdastyrý syndy usynystaryn da aıtty.
– Meniń oıymsha gazetke, jýrnalǵa ár adam óziniń tanym kókjıekterin keńeıtý úshin jazylýy kerek. Internettegi aqparat sholaq. Árıne, qalta telefonnan jylt etken jańalyqty sholyp shyǵý yńǵaıly. Al tushynyp otyryp oqıtyn dúnıeniń deni gazetterde. Ekinshiden, búgingi oqıǵanyń bári tasqa basylǵandaı qaǵaz betinde qalýǵa tıis. Ekrannyń betindegi dúnıe sónip qalýǵa da múmkin. Aıtpaǵym, gazet-jýrnaldyń ǵumyrly bolýy úshin eńbek etýimiz kerek, – dep óz oıyn aıtty «Shyǵys jańalyqtary» JShS basshysy Erbolat Muqajanov.
«El búginshil, meniki erteń úshin», dep Ahmet Baıtursynuly aıtqandaı, búgingi bolyp jatqan eleýli dúnıelerdi qaǵazǵa basyp otyrmasaq, tarıhty zertteıtin erteńgi urpaq derek tappaı sharq urmaı ma? Aıtyp ótkendeı, jylp-jylp etken jelidegi jańalyq búgin bar, erteń joq. Sol úshin de telefonǵa telmirmeı, gazet oqý mádenıetin qalyptastyrǵanymyz jón shyǵar.
Shyǵys Qazaqstan oblysy