El men eldi, qala men aýyldy baılanystyratyn poshta qyzmetiniń sapaly bolýy asa mańyzdy. Búginde baspasóz ben oqyrmannyń arasynda kópir bola bilgen «Qazposhta» AQ Jazylýshy kúnin ótkizdi.
Dúnıeniń bir túkpirinen ekinshisine deıin hat joldaý, habarlama, sálemdeme jetkizý – poshta mekemesi atqaratyn mindetterdiń biri. Osy mindetterdi minsiz oryndaǵan, talaı jyldar boıy qajyrly eńbek etip kelgen, qazirgi kúnde zeınetke shyqqan poshtanyń qurmetti qyzmetkerleri de atalǵan jıynǵa qatysty.
Shara basynda Astana fılıaly bıznes jónindegi dırektorynyń orynbasary Ásel Syzdyqova bıylǵy jyldyń 2 qazanynan bastap 2024 jylǵa arnalǵan jazylym ashylǵanyn habarlady. Sondaı-aq barsha qaýymdy Qazposhtanyń 30 jyldyǵymen quttyqtap ótti.
Jyl saıyn dástúrli túrde ótetin naýqanda ár basylym óziniń alǵashqy jazylýshylaryna syılyqtar taratty. Al Qazposhta ujymy alǵashqy 20 jazylýshyǵa arnaıy sertıfıkattar tabys etti.
Búgingi resmı jıynǵa birneshe basylym óz ónimderin alyp kelip otyr. Onyń ishinde «Qazaq gazetteri» JShS, «Astana aqshamy», «Aıqyn-Lıter» JShS, «Túrkistan» gazeti, «Elordalyq bilim» gazeti men «Astanalyq ádisteme» jýrnaly, «Mádenı mura» jáne «National Geographic Qazaqstan» jýrnaldary bar.
«Jazylym Qazposhtanyń dástúrli qyzmetine aınalǵan. 1980 jyldary elektrondy aqparat quraldary bolmaǵan kezde, birden-bir aqparat kózi gazet bolatyn. Ár otbasy gazet-jýrnaldarǵa jazylatyn. Sol jyldary jazylym tırajy 456 myń danany qurady. Keıin memleketimiz jańadan qurylyp jatqan jyldary jazylym báseńsip, tipti jazylym sany nólge deıin túsip ketken kezder de bolǵan. Keıin, bas qalany Astanaǵa kóshirý jyldarynda jazylym birte-birte qalpyna kelip, tyń aqparattar, ýaqtyly, qyzyqty usynylǵan materıaldar alý qajettiligi qaıtadan jańardy.
Poshtashylardyń eńbekqorlyǵynyń arqasynda poshta bólimshesi árqashan óz mindetterin atqaryp keledi. Osy oraıda, barshańyzǵa zor densaýlyq, zeınetkerlerge zeınet ýaqytynda qyzyqty ómir tileımin. Jazylýshylar kúni qutty bolsyn!», deıdi poshta salasyna eńbegi sińgen zeınetker Evgenııa Felıksovna.
Zeınetker ótken ǵasyrdyń 80-jyldary gazet kúnine eki mezgil jetkiziletinin eske saldy.
«Tańerteńgi segizde jáne tústen keıin jetkiziletin. Búginde elektrondy BAQ damyǵan zamanda, kóptegen gazet sıfrlyq formatqa kóshýi jazylym bólimi úshin aýyr boldy», dedi E.Felıksovna.
Sondaı-aq jazylýshylardyń arasynda eń alǵashqy bolǵan zeınetker oqyrmandy ortaǵa shaqyryp, sertıfıkat tabys etti.
«Barshańyzdy baspasózge jazylý naýqanynyń bastalýymen quttyqtaımyn. Búgin Qazposhta ujymy baspasóz shyǵarýshylardy jáne oqyrmandardy shaqyryp is-shara ótkizip jatyr. Jyl basynda qazaqstandaǵy tanymal myqty gazetterdiń basyn biriktirip «Qazaq gazetteri» JShS qurylǵan edi. Onyń basynda bir ǵasyrdan kóp tarıhy bar «Egemen Qazaqstan» gazeti men «Kazahstanskaıa pravda» gazeti tur. Gazetterimizdiń oqyrmandary kóbeıe bersin. Dál qazirgi aqparattyń aqtarylyp jatqan zamanynda gazet shyǵarý, baspasózben aınalysý jáne ony oqyrmanǵa oqytý ońaı sharýa emes. Degenmen, osynyń barlyǵyn ysyryp qoıyp, gazetke jazylyp jatqan barlyq oqyrmandarymyzǵa alǵys aıtamyz», dedi «Egemen Qazaqstan» gazetiniń shef-redaktory Amangeldi Qııas.
«Men «Egemen Qazaqstan» gazetine 2000-jyldan bastap jazylǵanmyn. Qyzylorda oblysynyń týmasymyn. Jalpy, «Egemen Qazaqstan» gazetin barlyq januıamyzben birge oqyp júremiz. Búgin baspa men oqyrmandarǵa arnalǵan úlken naýqan bolyp jatyr eken, alǵysymdy bildiremin. Gazetterdiń oqyrmandary kóbeıe bersin. Baspasóz damı bersin!», deıdi «Egemen Qazaqstan» gazetiniń turaqty oqyrmany Talǵat Pirimbetov.